കോവിഡ്​ ലക്ഷണങ്ങൾ സമാനം, കണ്ടെത്തൽ സങ്കീർണം കോവിഡ്​ രോഗികളിൽ ഇനി ക്ഷയരോഗപരിശോധനയും

തിരുവനന്തപുരം: കോവിഡ്​ ബാധിതരിൽ വിട്ടുമാറാതെ രോഗലക്ഷങ്ങൾ നീളുന്നവരെ ക്ഷയരോഗ പരിശോധനക്ക്​ വിധേയമാക്കാൻ ആരോഗ്യവകുപ്പി​ൻെറ നിർദേശം. കോവിഡിന്​ സമാനമായ ലക്ഷണങ്ങളാണ് ക്ഷയരോഗത്തിനും. കോവിഡിൽ മാത്രം ശ്രദ്ധ കേന്ദ്രീകരിക്കുകയും ക്ഷയരോഗ സാധ്യത തിരിച്ചറിയാതിരിക്കുകയും ചെയ്യുന്നത്​ അപകടാവസ്​ഥക്ക്​ കാരണമാകുമെന്നതാണ്​ ആരോഗ്യവകുപ്പി​ൻെറ അടിയന്തര നിർദേശത്തിന്​ കാരണം. കോവിഡ്​ രോഗികളിൽ രണ്ടാഴ്​ചയോ അതിൽ കൂടുതലോ നീളുന്ന ​പനി, ചുമ, ഭാരക്കുറവ്​, രാത്രി ഉറക്കത്തിലെ വിയർക്കൽ എന്നിവയുള്ളവരെയാണ്​ ക്ഷയപരിശോധനക്ക്​ വിധേയമാക്കുന്നത്​. ക്ഷയരോഗത്തിന്​ കാരണമാകുന്ന മൈക്കോബാക്റ്റീരിയം ട്യൂബർകുലോസിസ് ശരീരത്തിൽ പ്രവേശിച്ചാൽ സാവധാനത്തിലാണ്​ ലക്ഷണങ്ങൾ പ്രകടമാക്കുക. ക്ഷയരോഗികളിലെ കോവിഡ്​ പകർച്ച സങ്കീർണമായ ശാരീരികാവസ്​ഥക്ക്​ ഇടയാക്കു​െമന്നും പഠനങ്ങളുണ്ട്​. പ്രായാധിക്യം, പോഷകാഹാരക്കുറവ്​, ഗുരുതര ശ്വാസകോശ രോഗങ്ങൾ, പ്രമേഹം, പ്രത​ിരോധ ശേഷിയില്ലായ്​മ എന്നിങ്ങനെ കോവിഡ്​ ബാധക്ക്​ അനുകൂലമായ സാഹചര്യങ്ങൾ തന്നെയാണ്​ ​ക്ഷയത്തിനും. 2025ഒാടെ ക്ഷയരോഗത്തെ പൂർണമായ​ും സംസ്​ഥാനത്തുനിന്ന്​ നിർമാർജനം ചെയ്യുക എന്ന ലക്ഷ്യത്തോടെയുള്ള പ്രവർത്തനങ്ങൾ പുരോഗമിക്കു​േമ്പാഴാണ്​ കോവിഡ്​ ബാധയുണ്ടാകുന്നത്​. ജലദോഷപ്പനിക്കാരിൽ കോവിഡ്​ പരിശോധന നടത്തണമെന്നത്​ നേരത്തെ തന്നെ ആരോഗ്യവകുപ്പി​ൻെറ പരിഷ്​കരിച്ച പരിശോധന മാർഗനിർദേശങ്ങളിൽ ഉൾപ്പെടുത്തിയിരുന്നു. എന്നാൽ, ക്ഷയരോഗ ലക്ഷണങ്ങളുള്ള ജലദോഷപ്പനിക്കാരെ ക്ഷയരോഗ പരിശോധനക്ക്​ വിധേയമാക്കണമെന്നാണ്​ പുതിയ നിർദേശം. സി.ബി നാറ്റ്​, ട്രൂനാറ്റ്​ പരിശോധനകളാണ്​ ക്ഷയരോഗ നിർണയത്തിന്​ നടത്തുന്നത്​. കോവിഡ്​ നെഗറ്റീവായവരിൽ ജലദോഷപ്പനി 14 ദിവസത്തിൽ കൂടുതൽ തുടരുന്നുണ്ടെങ്കിൽ ഇവർക്കും​ പരിശോധന വേണം. ഇത്തരക്കാരെ നിരീക്ഷിക്കുന്നതിന്​ പ്രാഥമിക-കുടുംബ-സാമൂഹികാരോഗ്യ കേന്ദ്രങ്ങൾ വഴിയും താലൂക്ക്​ ആശുപത്രികൾ വഴിയും സംവിധാനമുണ്ടാക്കണം. കോവിഡ്​ രോഗികളെ ക്ഷയ പരിശോധനക്കായി ടി.ബി സൻെററുകളിലേക്ക്​ മാറ്റേണ്ടതില്ല. നിലവിലെ കോവിഡ്​ സംവിധാനം വഴി സാമ്പിൾ ശേഖരിച്ച്​ ക്ഷയരോഗ പരിശോധനക്ക്​ അയക്കണമെന്നും നിർദേശങ്ങളിലുണ്ട്​.