അവാർഡ്​ തുക അർബുദ രോഗികളുടെ ചികിത്സക്ക്​ മാറ്റി​െവച്ച് നെടുമങ്ങാട് ബ്ലോക്ക് പഞ്ചായത്ത്​

നെടുമങ്ങാട്: നാലു വർഷത്തിനിടെ ലഭിച്ച അവാർഡുകളുടെ തുക അർബുദ രോഗികളുടെ ചികിത്സക്ക്​ മാറ്റി​െവച്ച് നെടുമങ്ങാട് ബ്ലോക്ക് പഞ്ചായത്തി​ൻെറ ശ്രദ്ധേയ പദ്ധതി. രോഗമുക്തി ആകുന്നതുവരെയോ ജീവിതാവസാനം വരെയോ പ്രതിമാസം 1000 രൂപ വീതം നൽകുന്നതാണ് 'നെടുമങ്ങാടിൻ അഭയം'എന്ന പദ്ധതി. ആദ്യഘട്ടം 35 രോഗികൾക്കാണ് സഹായം. 15ന് മുമ്പ്​ പദ്ധതി മുഖ്യമന്ത്രി ഉദ്ഘാടനം ചെയ്യും. ബ്ലോക്ക് തല കമ്മിറ്റിയാണ്‌ രോഗികളെ തെരഞ്ഞെടുക്കുന്നത്. പഞ്ചായത്തുകളിൽ വി.ഇ.ഒമാരാണ് കോഓഡിനേറ്റർ. ബ്ലോക്ക് പഞ്ചായത്ത് സെക്രട്ടറി അക്കൗണ്ട് കൈകാര്യം ചെയ്യും. സുമനസ്സുകളുടെ സഹായം കൂടി ലഭിച്ചാൽ കൂടുതൽ രോഗികൾക്ക് പണം നൽകാൻ കഴിയുമെന്ന് ബ്ലോക്ക് പഞ്ചായത്ത് പ്രസിഡൻറ്​ ബി. ബിജു അറിയിച്ചു. കഴിഞ്ഞ നാലുവർഷത്തിനിടെ ദേശീയ, സംസ്ഥാന അവാർഡുകൾ ഉൾപ്പെടെ നിരവധി പുരസ്കാരങ്ങൾ ബ്ലോക്ക് പഞ്ചായത്തിന്​ ലഭിച്ചു. 1.31 കോടി രൂപ അവാർഡ് തുകയായി ലഭിച്ചു. പണം ബാങ്കിൽ നിക്ഷേപിച്ച് ലഭ്യമാകുന്ന പലിശയും 10 ശതമാനം സി.എസ്.ആർ ഫണ്ടും ചേർത്ത തുകയാണ് ധനസഹായമായി നൽകുന്നത്. കേന്ദ്ര സർക്കാറി​ൻെറ ദീൻദയാൽ ഉപാധ്യായ പഞ്ചായത്ത് സാശാക്തീകരൺ ദേശീയ പുരസ്കാരം തുടർച്ചയായി മൂന്ന് തവണയും മികച്ച ബ്ലോക്ക് പഞ്ചായത്തിനുള്ള സംസ്ഥാന സർക്കാറി​ൻെറ സ്വരാജ് ട്രോഫി തുടർച്ചയായി രണ്ടു തവണയും നെടുമങ്ങാട് ബ്ലോക്ക് പഞ്ചായത്തിനെ തേടിയെത്തിയിട്ടുണ്ട്. ത്രിതല പഞ്ചായത്ത് സംവിധാനത്തിൽ ബ്ലോക്ക് പഞ്ചായത്തിന് പ്രത്യേക സ്ഥാനമുണ്ടെന്ന് തെളിയിച്ചിരിക്കുകയാണ് നെടുമങ്ങാട് ബ്ലോക്ക് പഞ്ചായത്ത്.