കെയര്‍ ഹോമിലെ കുട്ടികള്‍ക്ക് മധുരവുമായി കലക്ടര്‍

തിരുവനന്തപുരം: ഓണത്തോടനുബന്ധിച്ച്​ വി​മന്‍-ചില്‍ഡ്രന്‍ ഹോമിലെ അന്തേവാസികള്‍ക്ക് മധുരവുമായി കലക്ടര്‍ ഡോ. നവജ്യോത് ഖോസ. പി.ടി.പി നഗറില്‍ പ്രവര്‍ത്തിക്കുന്ന കെയര്‍ഹോമിൽ മധുരവും സമ്മാനപ്പൊതികളുമായെത്തിയ കലക്ടറെ അന്തേവാസികളും ജീവനക്കാരും ചേര്‍ന്ന് സ്വീകരിച്ചു. സംസ്ഥാന വനിതാ-ശിശുവികസന വകുപ്പിന് കീഴില്‍ മഹിള സമഖ്യാ സൊസൈറ്റിയുടെ നേതൃത്വത്തില്‍ പ്രവര്‍ത്തിക്കുന്ന കെയര്‍ഹോമില്‍ 18 പെണ്‍കുട്ടികളാണ് താമസിക്കുന്നത്. ജീവനക്കാരോട് കെയര്‍ഹോമി​ൻെറ പ്രവര്‍ത്തനങ്ങള്‍ ചോദിച്ചറിഞ്ഞ കലക്ടര്‍ കോവിഡ് മാനദണ്ഡങ്ങള്‍ വിലയിരുത്തി. ഓണം പരമാവധി വീടുകളില്‍ ആഘോഷിക്കണമെന്നും കൂടുതല്‍ ജാഗ്രത പുലര്‍ത്തണമെന്നും കലക്ടര്‍ പറഞ്ഞു. കോവിഡി​ൻെറ പശ്ചാത്തലത്തിൽ ഓൾഡ് ഏജ് ഹോമുകളിലെ സന്ദർശനം ഒഴിവാക്കിയതായും ഓൺലൈനിലൂടെ ഇവിടങ്ങളിലെ ഓണാഘോഷങ്ങളുടെ ഭാഗമാകുമെന്നും കലക്ടർ അറിയിച്ചു.