ജൂനിയർ നഴ്​സുമാർ അനിശ്ചിതകാല സമരത്തിൽ, നഴ്സിങ് വിദ്യാർഥിനികളെ തിരികെ വിളിക്കുന്നു

തിരുവനന്തപുരം: സ്​റ്റൈപ്പൻഡ്​ വർധന ആവശ്യ​പ്പെട്ട സർക്കാർ മെഡിക്കൽ കോളജിലെ ജൂനിയർ നഴ്​സുമാർ അനിശ്ചിതകാല സമരം തുടങ്ങിയ സാഹചര്യത്തിൽ പകരം സൗകര്യമേർപ്പെടുത്താൻ നഴ്സിങ് വിദ്യാർഥിനികളെ തിരികെ വിളിക്കുന്നു. സർക്കാർ നഴ്​സിങ്​ കോളജുകളി​െല അവസാന വർഷ ബി.എസ്​സി, ജനറൽ നഴ്​സിങ്​ വിദ്യാർഥികളെയാണ്​ ആശുപത്രികളി​ൽ നിയോഗിക്കാൻ തീരുമാനിച്ചത്​. ഇൗ മാസം 24 മുതൽ അക്കാദമിക്​-ക്ലിനിക്​ ഡ്യൂട്ടിക്ക്​ വിദ്യാർഥികളെ ഹാജരാക്കണമെന്ന്​ നഴ്​സിങ്​ കോളജ്​ പ്രിൻസിപ്പൽമാർക്ക്​​ ആരോഗ്യവകുപ്പ്​ നിർദേശം നൽകി. കോഴ്​സ്​ കഴിഞ്ഞ്​ ഒരുവർഷത്തെ നിർബന്ധിത സേവനമനുഷ്ഠിക്കുന്ന 375 ജൂനിയർ നഴ്​സുമാരാണ്​ വെള്ളിയാഴ്​ച മുതൽ സമരമാരംഭിച്ചത്​. സ്​റ്റാഫ്​ നഴ്​സുമാരുടെ അടിസ്​ഥാന വേതനത്തിന്​ തുല്യമായ തുക തങ്ങൾക്ക്​ ​സ്​റ്റൈപ്പൻഡായി നൽകണമെന്നാണ്​ വ്യവസ്​ഥയെങ്കിലും അത്​ പാലിക്കുന്നില്ലെന്ന്​ ഇവർ ആരോപിക്കുന്നു. 2016 ലാണ്​ 6000 രൂപയിൽനിന്ന്​ അന്നത്തെ സ്​റ്റാഫ് നഴ്സി​ൻെറ അടിസ്ഥാനശമ്പളമായ 13,900 രൂപയാക്കി സ്​റ്റെ​െപ്പൻഡ്​ ഉയർത്തിയത്. എന്നാൽ ശമ്പള പരിഷ്കരണം നടക്കുകയും സ്​റ്റാഫ് നഴ്സി​ൻെറ അടിസ്ഥാനശമ്പളം 27,800-59,400 എന്ന സ്കെയിലിലേക്ക് പരിഷ്കരിക്കുകയും ചെയ്തു. പുതിയ ശമ്പള പരിഷ്കരണം നിലവിൽ വന്ന് നാലുവർഷം കഴിഞ്ഞും ജൂനിയർ നഴ്​സുമാരുടെ ആനുകൂല്യത്തിൽ ഒരു വർധനയും വരുത്തിയിട്ടില്ല. സമാനസ്വഭാവത്തിൽ കോവിഡ്​ ഡ്യൂട്ടി ചെയ്യുന്ന മറ്റ്​ വിഭാഗങ്ങൾക്ക്​ ഉയർന്ന നിരക്കിൽ​ സർക്കാർ വേതനം നിശ്ചയിക്കുകയും ചെയ്​തിരുന്നു. പ്രശ്​നം പരിഹരിക്കണമെന്നാവശ്യപ്പെട്ട്​ ഇൗ മാസം എട്ടിന്​ കരിദിനം ആചരിക്കുകയും ഒമ്പതിന്​ ഒരു ദിവസത്തേക്ക്​ ഡ്യൂട്ടിയിൽനിന്ന്​ വിട്ടുനിൽക്കുകയും ചെയ്​തിരുന്നു. തുടർന്നും പരിഹാരം കാണാത്ത സാഹചര്യത്തിലേക്കാണ്​​ അനിശ്ചിതകാല സമരത്തിലേക്ക്​ നീങ്ങിയത്​​. അതേസമയം ജോലിയിൽ തിരികെ പ്രവേശിച്ചില്ലെങ്കിൽ രജിസ്​ട്രേഷൻ റദ്ദാക്കുമെന്ന്​ അധികൃതർ ഭീഷണിപ്പെടുത്തുന്നതായി സമരക്കാർ പറയുന്നു.