വിമാനത്താവള സ്വകാര്യവത്​കരണ നടപടികളുമായി സഹകരിക്കില്ല -ജോയൻറ്​ ആക്‌ഷൻ കൗൺസിൽ

തിരുവനന്തപുരം: ഏറ്റവും നല്ലനിലയിലും ലാഭത്തിലും പ്രവർത്തിക്കുന്ന തിരുവനന്തപുരം അന്താരാഷ്​ട്ര വിമാനത്താവളം സ്വകാര്യസ്ഥാപനത്തിന് കൈമാറാനുള്ള കേന്ദ്രസർക്കാർ നീക്കം പ്രതിഷേധാർഹമാണെന്ന് വള്ളക്കടവ്-വയ്യാമൂല ജോയൻറ്​ ആക്‌ഷൻ കൗൺസിൽ ചെയർമാൻ എ. സൈഫുദ്ദീൻ ഹാജിയും ജനറൽ കൺവീനർ എൻ. വിക്രമൻ നായരും അറിയിച്ചു. വിമാനത്താവളത്തി​ൻെറ തുടർന്നുള്ള വികസനത്തിന് നൂറോളം കുടുംബങ്ങളെ കുടിയൊഴിപ്പിച്ച്​ 18 ഏക്കർ ഭൂമി ഏറ്റെടുക്കാനുള്ള നടപടികളുമായി ആക്‌ഷൻ കൗൺസിൽ തത്വത്തിൽ സഹകരിച്ചിരുന്നതാണ്. എയർപോർട്ട് അതോറിറ്റി ഓഫ് ഇന്ത്യക്ക് വേണ്ടി സംസ്ഥാന സർക്കാറാണ് തദ്ദേശവാസികളുമായി വർഷങ്ങളോളം ചർച്ചകൾ നടത്തി ഒത്തുതീർപ്പിലെത്തിയിരുന്നത്. എന്നാൽ, സ്വകാര്യവത്കരിക്കുന്നതോടെ മുൻതീരുമാനങ്ങളിൽനിന്ന്​ ആക്‌ഷൻ കൗൺസിൽ പിൻവാങ്ങുകയാണെന്ന്​ അവർ വ്യക്​തമാക്കി.