കപ്പൽപാത: കേന്ദ്രത്തിന്​ വീണ്ടും നിവേദനം നൽകും

കൊല്ലം: നിർദിഷ്​ട കപ്പൽപാത സംബന്ധിച്ച കേരളത്തിൻെറ ആശങ്കകൾ ഉൾപ്പെടുത്തി കേന്ദ്രസർക്കാറിന് വീണ്ടും നിവേദനം നൽകുമെന്ന് മന്ത്രി ജെ. മേഴ്സിക്കുട്ടിയമ്മ. കേന്ദ്ര സർക്കാർ ആഗസ്​റ്റ്​ ഒന്നുമുതൽ നടപ്പാക്കുന്ന കപ്പൽപാത കേരള തീരത്തുനിന്ന്​ 50 നോട്ടിക്കൽ മൈൽ അകലെക്കൂടി എങ്കിലും നടപ്പാക്കുന്നതായിരിക്കും അഭികാമ്യമെന്നും മന്ത്രി പറഞ്ഞു. വിവിധ മത്സ്യത്തൊഴിലാളി സംഘടനകളുടെ അഭിപ്രായം കൂടി കണക്കിലെടുത്ത് കേന്ദ്ര സർക്കാറിന് രണ്ടാമത്തെ നിവേദനം നൽകുന്നതിന് വിളിച്ച വിഡിയോ കോൺഫറൻസിൽ സംസാരിക്കുകയായിരുന്നു മന്ത്രി. പദ്ധതിയുമായി കേന്ദ്രം മുന്നോട്ടുവന്നപ്പോൾതന്നെ സംസ്​ഥാനത്തിൻെറ ആശങ്ക അറിയിച്ചിരുന്നു. 2018 നവംബർ 22ന് കേന്ദ്ര ഷിപ്പിങ് മന്ത്രാലയത്തിന് നിവേദനം സമർപ്പിച്ചിരുന്നു. പുതിയ കപ്പൽപാത വരുന്നതുമൂലം ഉണ്ടാകുന്ന അപകടങ്ങളിൽ മത്സ്യത്തൊഴിലാളികൾക്ക് നഷ്​ടപരിഹാരം പോലും ലഭിക്കാത്ത അവസ്ഥയാണ്. വാണിജ്യ കപ്പലുകൾ പ്രധാനമായും വടക്കുനിന്ന്​ തെക്കോട്ടാണ് സഞ്ചരിക്കുന്നത്. എന്നാൽ, മത്സ്യബന്ധന യാനങ്ങൾ കിഴക്കുനിന്ന്​ പടിഞ്ഞാറു ഭാഗത്തേക്കാണ് പോകുന്നത്. ഇത് അപകടസാധ്യത വർധിപ്പിക്കും. കഴിഞ്ഞ കാലങ്ങളിലുണ്ടായ അപകടങ്ങൾ, വാണിജ്യ കപ്പലുകളുടെ സഞ്ചാരപഥം, അനുവദിക്കാവുന്ന പരമാവധി കപ്പലുകളുടെ എണ്ണം എന്നിവ കൂടി പരിശോധിച്ച് അപകടസാധ്യത പരമാവധി കുറയ്ക്കാൻ നിർദിഷ്​ട കപ്പൽപാത ദൂരേക്ക് മാറ്റേണ്ടതുണ്ട്. കടൽയാത്രയുടെ സുരക്ഷ, കടൽ സുരക്ഷ, കൂട്ടിയിടിക്കൽ പരമാവധി ഒഴിവാക്കുന്നതിനുള്ള നടപടികൾ എന്നിവകൂടി പരിഗണിച്ചുവേണം തീരുമാനമെടുക്കേണ്ടത്. കേരളത്തിൽ ലഭിക്കുന്ന മത്സ്യത്തിൻെറ 90 ശതമാനവും 50 നോട്ടിക്കൽ മൈലിനുള്ളിൽനിന്നാണ് പിടിക്കുന്നത്. മത്സ്യഫെഡ് ചെയർമാൻ പി.പി. ചിത്തരഞ്​ജൻ, കേരള മത്സ്യത്തൊഴിലാളി ഫെഡറേഷൻ പ്രസിഡൻറ് കൂട്ടായി ബഷീർ, കേരള സ്വതന്ത്ര മത്സ്യത്തൊഴിലാളി ഫെഡറേഷൻ പ്രസിഡൻറ് ടി. പീറ്റർ, ജനറൽ സെക്രട്ടറി ജാക്സൺ പൊള്ളയിൽ, ഒാൾ കേരള ബോട്ട് അസോസിയേഷൻ പ്രതിനിധികളായ ജോസഫ് സേവിയർ കളപ്പുരയ്ക്കൽ, ഉമ്മൻ ഓട്ടുമ്മൻ (എസ്​.റ്റി.യു), ശിവദാസ്​ (ജനതാ മത്സ്യത്തൊഴിലാളി യൂനിയൻ), പുല്ലുവിള സ്​റ്റാൻലി (കേരള സംസ്​ഥാന അനുബന്ധ മത്സ്യത്തൊഴിലാളി യൂനിയൻ), ഫിഷറീസ്​ വകുപ്പ് സെക്രട്ടറി ടിങ്കു ബിസ്വാൾ എന്നിവർ യോഗത്തിൽ പങ്കെടുത്തു.