അഭിമന്യൂ വധത്തിൽ പങ്കുണ്ടെന്ന് ആരോപിച്ച്​ ഫേസ്​ബുക്ക് പോസ്​റ്റ്​: സി.പി.എം ജില്ലാ സെക്രട്ടറിക്കെതിരെ ജമാഅത്തെ ഇസ്‌ലാമിയുടെ വക്കീൽ നോട്ടീസ്

തിരുവനന്തപുരം: അഭിമന്യൂ വധത്തിന് പിന്നിൽ ജമാഅത്തെ ഇസ്‌ലാമിയാണെന്ന്​ ആരോപിച്ച്​ ഫേസ്​ബുക്ക് കുറിപ്പ് പ്രസിദ്ധീകരിച്ച സി.പി.എം തിരുവനന്തപുരം ജില്ലാ സെക്രട്ടറി ആനാവൂർ നാഗപ്പനെതിരെ ജമാഅത്തെ ഇസ്‌ലാമി വക്കീൽ നോട്ടീസ് അയച്ചു. സംഘടനയെ അപകീർത്തിപ്പെടുത്തിയ വ്യാജ ആരോപണങ്ങൾ പിൻവലിച്ച്​ നിരുപാധികം മാപ്പുപറയണമെന്നും അമ്പത് ലക്ഷം രൂപ നഷ്​ടപരിഹാരം നൽകണമെന്നും ആവശ്യപ്പെട്ടാണ് നോട്ടീസ്. കാമ്പസിലെ രാഷ്​ട്രീയ സംഘട്ടനത്തി​ൻെറ ഭാഗമായി സംഭവിച്ച അഭിമന്യൂ കൊലയിലേക്ക് സമാധാനപരമായി പ്രവർത്തിക്കുന്ന ജമാഅത്തെ ഇസ്‌ലാമിയുടെ പേര് വലിച്ചിഴക്കുന്നത് ദുരുദ്ദേശ്യപരമാണ്. 02.06.2019ന്​ ആനാവൂർ നാഗപ്പ​ൻെറ ഔദ്യോഗിക ഫേസ്​ബുക്ക് പേജിൽ എഴുതിയ കുറിപ്പ് ജമാഅത്തെ ഇസ്‌ലാമിയെ അപകീർത്തിപ്പെടുത്താൻ ബോധപൂർവം തയാറാക്കിയതാണെന്നും അമിമന്യൂ വധത്തിൽ ജമാഅത്തെ ഇസ്‌ലാമിക്കോ സംഘടനയുമായി ബന്ധമുള്ള മാറ്റാർക്കെങ്കിലുമോ ഒരു പങ്കുമി​െല്ലന്നും നോട്ടീസിൽ പറയുന്നു. ജമാഅത്തെ ഇസ്‌ലാമിക്കെതിരെ മതതീവ്രവാദ വർഗീയ പ്രസ്ഥാനം എന്നടക്കമുള്ള കുറിപ്പിലെ ആരോപണങ്ങൾ അടിസ്ഥാനരഹിതമാണ്. രാഷ്​ട്രീയ തെരഞ്ഞെടുപ്പ് മുന്നിൽ കണ്ടുള്ള വ്യാജ പ്രചാരണങ്ങളാണ് ഇതെന്നും നോട്ടീസിൽ ആരോപിക്കുന്നു. ജമാഅത്തെ ഇസ്‌ലാമി ജനറൽ സെക്രട്ടറി വി.ടി. അബ്​ദുല്ലക്കോയ തങ്ങൾക്കുവേണ്ടി അഡ്വ. അമീൻ ഹസനാണ് നോട്ടീസ് അയച്ചത്.