ഡി.വൈ.എഫ്​.ഐ ഫ്രീഡം സ്​ട്രീറ്റ്​: ബ്രിട്ടീഷുകാർക്കൊപ്പമുണ്ടെന്ന്​ പറഞ്ഞവർ​ ഇന്ന്​ നേരവകാശികളാവുന്നു -മുഖ്യമന്ത്രി

August 15th news തിരുവനന്തപുരം: ബ്രിട്ടീഷ്​ വൈസ്രോയിയെ കണ്ട്​ തങ്ങൾ ഒപ്പമുണ്ടെന്ന്​ പറഞ്ഞവരാണ്​ ഇന്ന്​ സ്വാതന്ത്ര്യസമരത്തിന്‍റെ നേരവകാശികളാവാൻ ശ്രമിക്കുന്നതെന്ന്​ മുഖ്യമന്ത്രി പിണറായി വിജയൻ. ​ഡി.വൈ.എഫ്​.ഐ സംഘടിപ്പിച്ച ഫ്രീഡം സ്ട്രീറ്റ് ഉദ്​ഘാടനം ചെയ്യുകയായിരുന്നു അദ്ദേഹം. സവർക്കറെ ആനയിച്ച്​ ചരിത്രം തിരുത്താനാണ്​ പ്രധാനമന്ത്രി ശ്രമിക്കുന്നത്​. എല്ലാവരുടെയും ശ്രദ്ധ വർഗീയതയിലേക്ക്​ തിരിച്ചുവിടാനും രാജ്യത്ത്​ നിലനിൽക്കുന്ന ഭരണഘടന മൂല്യങ്ങളെ ഇല്ലാതാക്കാനും ശ്രമിക്കുകയാണ് സംഘ്​പരിവാർ​. കേരളത്തിൽ യു.ഡി.എഫും ബി.ജെ.പിയും തോളോട്​ തോൾ ചേർന്നാണ്​ ​പ്രവർത്തിക്കുന്നതെന്നും അദ്ദേഹം പറഞ്ഞു. മന്ത്രി വി. ശിവൻകുട്ടി, മേയർ ആര്യ രാജേന്ദ്രൻ, സി.പി.എം ജില്ല സെക്രട്ടറി ആനാവൂർ നാഗപ്പൻ, കടകംപള്ളി സുരേന്ദ്രൻ എം.എൽ.എ, ഡി.വൈ.എഫ്​.ഐ ജില്ല പ്രസിഡന്റ് വി. അനൂപ്, സെക്രട്ടറി ഷിജൂഖാൻ, സംസ്ഥാന സെക്രട്ടറി വി.കെ. സനോജ്, നടൻ പ്രേംകുമാർ, സി.ഐ.ടി.യു സംസ്ഥാന സെക്രട്ടറി കെ.എസ്. സുനിൽ കുമാർ, അഖിലേന്ത്യ ജനാധിപത്യ മഹിള അസോസിയേഷൻ സംസ്ഥാന ജോയന്റ് സെക്രട്ടറി എസ്. പുഷ്പലത തുടങ്ങിയവർ സംബന്ധിച്ചു.