തൊഴിലിടങ്ങളില്‍ ക്രഷ്​, ആദ്യത്തേത്​ പട്ടം പി.എസ്​.എസ്​ ഓഫിസിൽ

തിരുവനന്തപുരം: 'തൊഴിലിടങ്ങളില്‍ ശിശു പരിപാലന കേന്ദ്രം' പദ്ധതിയുടെ ഭാഗമായ ആദ്യ ക്രഷ്​ പട്ടം പി.എസ്​.സി ഓഫിസിൽ. കുഞ്ഞുങ്ങൾക്കു വേണ്ട സൗകര്യങ്ങള്‍ പൊതുയിടങ്ങളില്‍ ഒരുക്കുക, മുലയൂട്ടൽ ​പ്രോത്സാഹിപ്പിക്കുക എന്നീ ലക്ഷ്യങ്ങളോടെയാണ്​ തൊഴിലിടങ്ങളില്‍ ശിശുപരിപാലന കേന്ദ്രം പദ്ധതി നടപ്പാക്കുന്നത്​. സര്‍ക്കാര്‍, പൊതുമേഖല ഓഫിസുകളിലായി 25 ക്രഷുകളാണ് ആരംഭിക്കുന്നത്. പദ്ധതിക്കായി അധിക സൗകര്യങ്ങളൊരുക്കുന്നതിന് 50 ലക്ഷം രൂപയാണ് അനുവദിച്ചത്​. ശിശു സൗഹൃദ ഫര്‍ണിചർ, ബേബി മോണിറ്ററിങ്​ ഉപകരണങ്ങള്‍, മെത്ത, കളിപ്പാട്ടങ്ങള്‍, ബെഡ്ഷീറ്റ്, പായ, റെഫ്രിജറേറ്റർ, വാഷിങ്​ മെഷീന്‍, ഗ്യാസ് സ്റ്റൗ, ഗ്യാസ് കണക്ഷന്‍, പാചകത്തിനുള്ള പാത്രങ്ങള്‍, മുലയൂട്ടൽ ഇടങ്ങൾ എന്നിവയാണ്​ ഒരുക്കുക. തിരുവനന്തപുരം ജില്ലയിലെ കിന്‍ഫ്ര കാമ്പസ്, വെള്ളായണി കാര്‍ഷിക സര്‍വകലാശാല, ആലപ്പുഴ ജില്ലയിലെ കൃഷ്ണപുരം പഞ്ചായത്ത്, എറണാകുളം കലക്ടറേറ്റ്, പാലക്കാട് ചിറ്റൂര്‍ മിനി സിവില്‍ സ്‌റ്റേഷന്‍, കോഴിക്കോട് കലക്ടറേറ്റ്, വയനാട് കൽപറ്റ സിവില്‍ സ്‌റ്റേഷന്‍, കാസർകോട്​ ജില്ലയിലെ നീലേശ്വരം ബ്ലോക്ക് പഞ്ചായത്ത് എന്നിവിടങ്ങളിലും ഉടന്‍ പദ്ധതി ആരംഭിക്കും. 'തൊഴിലിടങ്ങളില്‍ ശിശുപരിപാലന കേന്ദ്രം' സംസ്ഥാനതല ഉദ്ഘാടനം ബുധനാഴ്ച രാവിലെ 11ന്​ പി.എസ്.സി ഓഫിസില്‍ മന്ത്രി വീണാ ജോര്‍ജ് നിര്‍വഹിക്കും.