യാത്രകൾക്ക്​ ചെലവേറും; സ്ലീപ്പറുകൾ വെട്ടിക്കുറച്ച്​ പകരം എ.സി കോച്ചുകൾ കൂട്ടാൻ നീക്കം

തിരുവനന്തപുരം: ഇളവുകൾ ഓരോന്നായി വെട്ടിക്കുറക്കുന്നതിന്​ പിന്നാലെ സ്ലീപ്പർ കോച്ചുകളുടെ എണ്ണം കുറച്ച്​ പകരം എ.സി ​കോച്ചുകളുടെ എണ്ണം കൂട്ടാൻ റെയിൽവേ നീക്കം. മിതമായ നിരക്കുള്ള സ്ലീപ്പർ കോച്ചുകളുടെ എണ്ണം കുറയുന്നതോടെ ചെലവേറിയ എ.സി കോച്ചുകൾ ​തെരഞ്ഞെടുക്കാൻ യാത്രക്കാർ നിർബന്ധിതരാകും. ഇതുവഴിയുള്ള വരുമാന വർധനയിലാണ്​ റെയിൽവേയുടെ കണ്ണ്​. കോവിഡിന്‍റെ മറവിൽ ജനറൽ കോച്ചുകൾ ഒഴിവാക്കി, പകരം റിസർവേഷൻ കോച്ചുകൾ ഏർപ്പെടുത്തി ലാഭം കൊയ്ത തന്ത്രമാണ്​ സ്ലീപ്പറുകളുടെ കാര്യത്തിലും ആവർത്തിക്കുന്നത്​. പാസഞ്ചർ ട്രെയിനുകളെയെല്ലാം എക്സ്​പ്രസുകളാക്കി മാറ്റിയതിനു​ പിന്നാ​ലെയാണ്​ പുതിയ നീക്കം. ഓരോ ട്രെയിനിലും സ്ലീപ്പർ കോച്ചുകളുടെ എണ്ണം രണ്ടായി പരിമിതപ്പെടുത്തുമെന്നാണ്​ വിവരം. അതേസമയം, എ.സി ത്രീ ടിയർ, എ.സി ടു ടിയർ എന്നീ കോച്ചുകളു​ടെ എണ്ണം കൂട്ടും. സ്ലീപ്പർ കോച്ചുകൾ രണ്ടായി ചുരുങ്ങു​മ്പോൾ എ.സി ത്രീ ടിയർ കോച്ചുകളുടെ എണ്ണം പത്തായും എ.സി ടു ടിയർ കോച്ചുകളുടെ എണ്ണം നാലായും വർധിക്കും. തിരുവനന്തപുരത്ത്​ നിന്ന്​ എറണാകുളത്തേക്കുള്ള സ്ലീപ്പർ ടിക്കറ്റ്​ നിരക്ക്​ 200 ൽ താ​ഴെയാണെങ്കിൽ എ.സി ത്രീ ടിയറിൽ ഇത്​ 500നു​ മുകളിലാണ്​. ടു ടിയറിലേക്കെത്തുമ്പോൾ ഇതു​ വീണ്ടും ഉയരും. ഒരു സ്ലീപ്പർ കോച്ചിൽ 72 ബെർത്തുകളാണുള്ളത്​. പരിഷ്കാരം നടപ്പായാൽ ട്രെയിനുകളിൽ നിലവിലെ 546 മുതൽ 792 വരെയുള്ള സ്ലീപ്പർ ബെർത്തുകൾ 144 ആയി കുറയും. ബദൽ മാർഗങ്ങളില്ലാതെ എ.സി കോച്ചുകൾ തെരഞ്ഞെടുക്കാൻ നിർബന്ധിതരാകുന്നതോടെ യാ​ത്രക്കാരുടെ പോക്കറ്റാകും ചോരുക. കോച്ചുകളുടെ ഘടന ഏകീകരിക്കൽ എന്ന പേരിലാണ്​ പുതിയ പരിഷ്കാരനീക്കം. ഏതെങ്കിലും​ ട്രെയിനുകളിൽ സ്ലീപ്പർ കോച്ചുകളുടെ എണ്ണം വർധിപ്പിക്കണമെങ്കിൽ ബന്ധപ്പെട്ട സോൺ കൃത്യമായ കാരണവും വിശദീകരണവും സഹിതം റെയിൽവേ ബോർഡിനെ സമീപിക്കണം. കോവിഡിന്‍റെ മറവിൽ പാസഞ്ചറുകൾ നിർത്തലാക്കുകയും പകരം ഇതേ സമയത്ത്​ എക്സ്​പ്രസുകൾ ഓടിക്കുകയും ചെയ്തതോടെ ഹ്രസ്വദൂരയാത്രകൾക്കടക്കം ചെലവേറിയിരുന്നു. ചെറിയ ദൂരത്തേക്ക്​ പോലും എക്സ്​പ്രസ്​ നിരക്കാണ്​ നൽകേണ്ടി വരുന്നത്​. മാത്രമല്ല നേരത്തേ പാസഞ്ചറുകൾക്കുണ്ടായിരുന്ന സ്​റ്റോപ്പുകളും വെട്ടിക്കുറച്ചത്​ ഗ്രാമങ്ങളുടെ റെയിൽ കണക്ടിറ്റിവിറ്റിതന്നെ നഷ്ടപ്പെടുത്തിയിട്ടുണ്ട്. വിവിധ റൂട്ടുകളിലായി സംസ്ഥാനത്ത്​ ഓടിയിരുന്ന 54 ഓളം പാസഞ്ചറുകളാണ്​ കോവിഡിന്‍റെ സാഹചര്യത്തിൽ നിർത്തലാക്കിയത്. എം. ഷിബു