നായ്​ കടിയേൽക്കുന്നവരുടെ എണ്ണത്തിൽ മൂന്നിരട്ടി വർധന ചത്ത നായ്ക്കളിൽ മിക്കതിനും പേ വിഷബാധ

തിരുവനന്തപുരം: ​സംസ്ഥാനത്ത്​ പേവിഷബാധയും മരണങ്ങളും ആശങ്ക ഉയർത്തിയിരിക്കെ, തെരുവുനായ്​ കടിയേൽക്കുന്നവരുടെ എണ്ണത്തിൽ മൂന്നിരട്ടിയോളം വർധന​. സാധാരണ ​നായ്​ കടിയേറ്റ്​ ചികിത്സ തേടുന്നവരുടെ എണ്ണം വർഷത്തിൽ ഒരു ലക്ഷത്തോളം എത്താറുണ്ടെങ്കിലും ഈ വർഷം ഏഴുമാസത്തിനിടെ, അത്​ ഒരു ലക്ഷം കടന്നതായാണ്​ വിവരം. തെരുവുനായ്​ ഉൾപ്പെടെ വളർത്തുമൃഗങ്ങളുടെ കടിയേറ്റെത്തുന്നവരുടെ എണ്ണം വർധിച്ചതോടെ പേവിഷ വാക്സിനും ക്ഷാമം നേരിടുന്നു. അതിന്‍റെ അടിസ്ഥാനത്തിൽ തമിഴ്​നാട്ടിൽനിന്ന്​ കഴിഞ്ഞ ആഴ്ച എത്തിച്ച 5000 വയ്​ൽ പേവിഷ വാക്സിൻ ഒറ്റ ആഴ്ചകൊണ്ടാണ്​​ തീർന്നത്​. ഇതിനിടെ, അസ്വാഭാവികമായ സാഹചര്യങ്ങളിൽ ചത്തമൃഗങ്ങളിൽ മൃഗസംരക്ഷണ വകുപ്പ്​ നടത്തിയ പോസ്റ്റ്​മോർട്ടം പരിശോധനകളിൽ തെരുവുനായ്​ക്കൾ ഉൾപ്പെടെ 20 ശതമാനത്തിനും പേ വിഷബാധയെന്നതും ആശങ്കയിരട്ടിയാക്കി. കോട്ടയത്ത്​ അടുത്തിടെ ചത്ത 33 മൃഗങ്ങളെ പരിശോധിച്ചതിൽ 17 എണ്ണത്തിനും പേവിഷബാധ കണ്ടെത്തി. ഒരു വർഷത്തിനിടെ, 6000ത്തിലധികം പേർക്കാണ്​ ഇവിടെ തെരുവുനായുടെ കടിയേറ്റത്​. ഇത്​ ഗൗരവതരമെന്നാണ്​ മൃഗസംരക്ഷണ വകുപ്പ്​ മുന്നറിയിപ്പ്​ നൽകുന്നത്​. സംസ്ഥാനത്ത് നായ്​കടി ഏൽക്കുന്നവരുടെ എണ്ണം രണ്ടും മൂന്നും ഇരട്ടി വര്‍ധിച്ചതായി ആരോഗ്യവകുപ്പും സമ്മതിക്കുന്നു. ഇത്​ കണക്കിലെടുത്ത്​ പേ വിഷബാധയും അതുമൂലമുള്ള മരണങ്ങളും ഒഴിവാക്കാന്‍ ആരോഗ്യ വകുപ്പ് പ്രത്യേക കര്‍മപരിപാടി ആരംഭിച്ചു. വിവിധ വകുപ്പുകളുടെ ഏകോപനത്തോടെ പേ വിഷബാധക്കെതിരെ പ്രതിരോധം ശക്തമാക്കാനാണ്​ തീരുമാനം. ജൂലൈയിൽ ഒരു മരണമുൾപ്പെടെ കഴിഞ്ഞ ഏഴുമാസത്തിനിടെ, 14 പേവിഷമരണങ്ങളാണ്​ സംസ്ഥാനത്ത്​ സംഭവിച്ചത്​. അതിൽ വാക്​സിൻ സ്വീകരിച്ചവരും ഉൾപ്പെടുന്നു. മുമ്പെങ്ങുമില്ലാത്ത വിധം എന്തുകൊണ്ട്​ ഇപ്പോൾ വാക്സിൻ സ്വീകരിച്ചവർ മരിക്കുന്നെന്നത്​ സംബന്ധിച്ച്​ സമഗ്ര പഠനം വേണമെന്ന ആവശ്യം ശക്തമായിട്ടുണ്ട്​. കേരളത്തിൽ നായ്​കടിച്ചോ, മൃഗങ്ങൾ കടിച്ചോ ഒരാൾ പോലും മരിക്കാൻ പാടില്ല, അത്തരമൊരു സാഹചര്യമില്ലാതാക്കുകയാണ്​ വേണ്ടതെന്നും വാദം ഉയർന്നിട്ടുണ്ട്​. അതിന്‍റെ ഭാഗമായി ഇന്ത്യൻ പബ്ലിക്​ ഹെൽത്ത്​ അസോസിയേഷൻ കേരള ശാഖയും ഇന്ത്യൻ അസോസിയേഷൻ ഫോർ പ്രിവന്‍റിവ്​ ആൻഡ്​​ സോഷ്യൽ മെഡിസിനും സംയുക്തമായി വിദഗ്​ധരെ ഉൾപ്പെടുത്തി പ്ര​ത്യേക മാർഗരേഖ തയാറാക്കാനും തീരുമാനിച്ചിട്ടുണ്ടെന്ന്​ തിരുവനന്തപുരം മെഡിക്കൽ കോളജിലെ അസോസിയേറ്റ്​ പ്രഫസറും എപ്പിഡമോളജിസ്റ്റുമായ ഡോ. എ. അൽത്താഫ്​ പറഞ്ഞു. എ. സക്കീർ ഹുസൈൻ