എം.പിമാരിൽ ബി.പി.എല്ലുകാരും എ.പി.എല്ലുകാരും -സ്പീക്കർ

തിരുവനന്തപുരം: ലോക്സഭാംഗമായി താൻ ആദ്യമായി എത്തിയപ്പോൾ ശതകോടീശ്വരന്മാരായ എം.പിമാരെ കണ്ട് അന്ധാളിച്ചെന്ന് സ്പീക്കർ എം.ബി രാജേഷ്. നമ്മുടെ പാർലമെന്റിൽ എ.പി.എൽ എം.പിമാരും ബി.പി.എൽ എം.പിമാരും ഉണ്ടെന്ന് അന്നാണ് മനസ്സിലായത്. മുൻ നിയമസഭ സാമാജികരുടെ സമ്മേളനത്തിലാണ് അദ്ദേഹം പാർലമെന്റ് അനുഭവങ്ങൾ ഓർത്തെടുത്തത്. ആദ്യമായി ജയിച്ച്​ പാർലമെന്റിലെ ആദ്യപ്രസംഗം കഴിഞ്ഞപ്പോൾ ഒരു എം.പി വന്ന് തന്നെ അഭിനന്ദിച്ചു. പരിചയപ്പെടലും കുശലാന്വേഷണവുമെല്ലാം കഴിഞ്ഞ് തെരഞ്ഞെടുപ്പിന് എന്ത്​ ചെലവായെന്ന്​ അദ്ദേഹം ചോദിച്ചു. അങ്ങനെ ചെലവൊന്നും വന്നിട്ടില്ലെന്ന് താൻ പ്രതികരിച്ചപ്പോൾ തനിക്ക്​ 30 കോടി ചെലവായെന്ന്​ ഉത്തരേന്ത്യക്കാരനായ അദ്ദേഹം പറഞ്ഞതും​ രാജേഷ് ഓർത്തെടുത്തു. ഇത്രയും പണം എങ്ങനെയാണ് പോക്കറ്റിൽനിന്ന് ചെലവാക്കുന്നതെന്ന് ചോദിച്ചപ്പോൾ 60,000 കോടി രൂപ വാർഷിക വിറ്റുവരവുള്ള എം.പിയാണ് താനെന്നായിരുന്നു അദ്ദേഹത്തിന്റെ മറുപടി. കേരളത്തിൽ നിന്നുള്ളവർ മാത്രമായിരുന്നു വിറ്റുവരവിന്റെ കണക്ക്​ പറയാനില്ലാത്ത സാധാരണക്കാരായ എം.പിമാർ. പാർലമെന്റിൽ കേരളത്തിൽനിന്നുള്ള എം.പിമാർ ബി.പി.എൽ എം.പിമാരെന്നും മറ്റുള്ളവർ എ.പി.എൽ എം.പിമാരെന്നും അറിയപ്പെട്ട് തുടങ്ങിയത് അങ്ങനെയാണെന്നും അദ്ദേഹം പറഞ്ഞപ്പോൾ സദസ്സും​ ആസ്വദിച്ചു.