മണ്ണടരുകളിൽനിന്ന്​ ജീവശ്വാസത്തിലേക്ക്​; രാഹുലിനിത്​ രണ്ടാം ജന്മം

തിരുവനന്തപുരം: നെഞ്ചിടിപ്പിന്‍റെയും ആശങ്കയുടെയും മണിക്കൂറുകൾക്കൊടുവിൽ അന്തർ സംസ്ഥാന തൊഴിലാളിയെ മണ്ണിനടിയിൽനിന്ന്​ ഫയർഫോഴ്​സ്​ സാഹസികമായി ജീവിതത്തിലേക്ക്​ കൈപിടിച്ചു. തലസ്ഥാനത്ത്​ പനവിളക്ക്​ സമീപം ശനിയാഴ്ച രാവിലെ പത്തോടെയാണ്​ സംരക്ഷണഭിത്തിക്ക്​ മുകളിൽ ടെന്‍റിലുണ്ടായിരുന്ന തൊഴിലാളികൾ മണ്ണിടിഞ്ഞ്​ ​ 60 അടി താഴ്ചയിലേക്ക്​ പതിച്ചത്​. മണ്ണിനും ​സംരക്ഷണഭിത്തിയുടെ കോൺക്രീറ്റിനും പാറക്കഷണങ്ങൾക്കും അടിയിലായിരുന്നു​ അസം സ്വദേശികളായ രണ്ടു തൊഴിലാളികൾ. ഇതിൽ ദിവങ്കറിനെ (22) സംഭവം നടന്നയുടൻ ഓടിക്കൂടിയ നാട്ടുകാർതന്നെ രക്ഷപ്പെടുത്തി ജനറൽ ആശുപത്രിയിലെത്തിച്ചു. ഇയാൾക്ക്​ നിസ്സാര പരിക്കേ ഉള്ളൂ. നെഞ്ചോളം മണ്ണ്​ മൂടിയ നിലയിലായിരുന്ന രാഹുൽ ബിശ്വാസിനെ ​ (23) രണ്ടു​ മണിക്കൂർ നീണ്ട കഠിന ശ്രമത്തിനൊടുവിലാണ്​ പുറത്തെടുക്കാനായത്​. വീഴ്ചയിൽ ഇദ്ദേഹത്തിന്‍റെ വലത്തേ കൈക്ക്​ പൊട്ടലുണ്ട്​. രക്ഷാപ്രവർത്തനത്തിനിടെ ചെറുപോറൽ പോലുമേൽക്കാതെയാണ്​ ഫയൽഫോഴ്സ്​​ ദൗത്യം പൂർത്തിയാക്കിയത്​. പാർശ്വഭിത്തിക്ക്​ മുകളിലെ ഷെൽട്ടറിൽ ഭക്ഷണം തയാറാക്കുന്നതിനിടെയാണ്​ അപകടം. എപ്പോഴും ഇടിഞ്ഞുവീഴാവുന്ന നിലയിൽ ശേഷിച്ച സംരക്ഷണഭിത്തിയും മണ്ണിനടിയിൽപെട്ടയാളുടെ നിസ്സഹായതയും തുടർ അപകട ഭീതിയുമെല്ലാം നിറഞ്ഞ ചുറ്റുപാടിലായിരുന്നു രക്ഷാപ്രവർത്തനം. ഹൈഡ്രോളിക്​ ഉപകരണങ്ങൾ ഉണ്ടായിരുന്നെങ്കിലും ചെറിയ മണ്ണനക്കംപോലും സംരക്ഷണഭിത്തിയും മുകളിലെ മൺകൂനയും വീണ്ടും ഇടിഞ്ഞുവീഴാനും രക്ഷാപ്രവർത്തകരടക്കം അപകടത്തിൽ പെടാനും കാരണമാകുമെന്നതിനാൽ അവസാനംവരെയും കൈകൊണ്ട്​​ മണ്ണുനീക്കിയാണ്​ രാഹുലിനെ പുറത്തെടുത്ത്​. മണ്ണ്​ കോരി നീക്കാൻ ചിരട്ടപോലും ഉപയോഗിക്കാൻ കഴിയുന്ന സാഹചര്യമായിരുന്നില്ലെന്ന്​ ഫയർഫോഴ്​സ്​ പറഞ്ഞു. രക്ഷാ​പ്രവർത്തനത്തിനിടയിലും ചെറിയ തോതിൽ മുകളിൽനിന്ന്​ മണ്ണ്​ പൊഴിയുന്നുണ്ടായിരുന്നു. ഇതിനിടെ മെഡിക്കൽ സംഘവും എത്തി ഒരാൾക്ക്​ നിവർന്ന്​ നിൽക്കാൻപോലും ഇടമില്ലാത്തതിനാൽ ഇരുന്നും കിടന്നുമെല്ലാമാണ്​ മണ്ണ്​ നീക്കിയത്​. ഈ സമയമെല്ലാം രാഹുലിന്‍റെ പൊട്ടലേറ്റ വലത്​ കൈക്ക്​ ​ അനക്കമേൽക്കാതെ ഫയർഫോഴ്സ്​ ഉദ്യോഗസ്ഥർ താങ്ങിപ്പിടിച്ചിരുന്നു. ഉച്ചക്ക്​​ 12.30 ഓടെയാണ്​ രക്ഷാദൗത്യം പൂർത്തിയാക്കി രാഹുലിനെ മെഡിക്കൽ കോളജ്​ ആശുപത്രിയിൽ​ പ്രവേശിപ്പിച്ചത്​. റീജനൽ ഫയർ​ ഓഫിസർ ദിലീപ്​, ജില്ല ഫയർ ഓഫിസർ സൂരജ്​, സ്​റ്റേഷൻ ഓഫിസർമാരായ നിതിൻ രാജ്​, സജിത്​ എന്നിവരുടെ നേതൃത്വത്തിൽ 20 ഓളം സേനാംഗങ്ങളാണ്​​ രക്ഷാപ്രവർത്തനം നടത്തിയത്​.