കാട്ടാക്കട-ചൂണ്ടുപലക റോഡ്‌ നവീകരണത്തിന്‌ മൂന്നര കോടി

കാട്ടാക്കട: ചൂണ്ടുപലക മുതൽ കള്ളിക്കാട് വരെയുള്ള റോഡിന്റെ താൽക്കാലിക നവീകരണത്തിന് 3.5 കോടി രൂപ അനുവദിച്ചതായി ജി. സ്റ്റീഫൻ എം.എൽ.എ അറിയിച്ചു. ചൂണ്ടുപലക മുതൽ നെയ്യാർഡാം വരെയുള്ള 8.315 കിലോമീറ്റർ റോഡ് നവീകരിക്കുന്ന പദ്ധതി വൈകുന്നതിനാലാണ് അടിയന്തര നടപടി എന്ന നിലയിൽ കള്ളിക്കാട് വരെ പണി നടത്തുന്നത്. ചൂണ്ടുപലക നെയ്യാർഡാം റോഡിനായി കിഫ്ബി മുഖേന 58.93 കോടി രൂപയാണ് അനുവദിച്ചിട്ടുള്ളത്. നഗരത്തിലേക്ക് കുടിവെള്ളം എത്തിക്കുന്നതിനുള്ള പദ്ധതിയുടെ പൈപ്പ് ലൈൻ കടന്നുപോകുന്നതും ഈ റോഡിലൂടെയാണ്. രണ്ട് ​​പ്രധാന പ്രോജക്ടുകൾ ഒരേസമയം നടപ്പാക്കുന്നതിലുണ്ടായ സാങ്കേതിക തടസ്സത്താലാണ് ജോലികൾ വൈകുന്നത്. മഴക്കാലമായതോടെ നെയ്യാർഡാം റോഡ് പൂർണമായും തകർന്നതിനാൽ 30.70 ലക്ഷം രൂപയുടെ അടിയന്തര അറ്റകുറ്റപ്പണി നടത്തി. ഉപരിതലം മിനുക്കലിനാണ് 3.5 കോടി രൂപ കൂടി അനുവദിച്ചതെന്നും എം.എൽ.എ അറിയിച്ചു.