അഴിമതിക്കാർ ക്ഷേത്രങ്ങളിലെ പ്രധാന സ്ഥാനങ്ങളിൽ; രഹസ്യാന്വേഷണം തുടങ്ങി

തിരുവനന്തപുരം: ആരോപണവിധേയരും അഴിമതിക്കാരുമായ ആളുകൾക്ക്​ തിരുവിതാംകൂര്‍ ദേവസ്വം ബോർഡിന്​ കീഴിലെ ക്ഷേത്രങ്ങളില്‍ സുപ്രധാന നിയമനം ലഭിച്ചെന്ന ആക്ഷേപങ്ങളിൽ അന്വേഷണം. പ്രമുഖ ക്ഷേത്രങ്ങളില്‍ അടുത്തിടെ പ്രധാന ജോലിയിൽ പ്രവേശിച്ചവരെക്കുറിച്ചാണ്​ ദേവസ്വം മന്ത്രിയുടെ ഓഫിസ് രഹസ്യാന്വേഷണം ആരംഭിച്ചത്​. തിരുവാഭരണ മോഷണക്കേസുകളില്‍ കുറ്റക്കാരെന്നു​ കണ്ടെത്തിയവരുൾപ്പെടെയുള്ളവരുടെ സ്ഥാനം നഷ്ടപ്പെടാൻ ഇതോടെ സാധ്യതയേറി. അച്ചടക്ക നടപടി നേരിട്ടവർക്കോ, പണാപഹരണം, വിജിലന്‍സ് കേസുകൾ എന്നിവയിൽ ഉൾപ്പെട്ടവർക്കോ സുപ്രധാന സ്ഥാനം നല്‍കാന്‍ പാടില്ലെന്നാണ് വ്യവസ്ഥ. ഇതു പാലിക്കാതെ പണമുണ്ടാക്കാനാകുന്ന തസ്തികകളിൽ നിയമനം നടത്തിയെന്നാണ്​ വിവരം. ശബരിമല, ശ്രീകണ്‌ഠേശ്വരം, കൊട്ടാരക്കര ക്ഷേത്രങ്ങളിലെ നിയമനവുമായി ബന്ധപ്പെട്ടാണ്​ ആരോപണം. വെള്ളായണി ക്ഷേത്രത്തില്‍ തിരുമുടി പുതുക്കിപ്പണിയുന്നതുമായി ബന്ധപ്പെട്ട് നടന്ന അഴിമതിയില്‍ പ്രതിയായ ഉദ്യോഗസ്ഥന് ശ്രീകണ്‌ഠേശ്വരം ക്ഷേത്രത്തില്‍ നിയമനം ലഭിച്ചതാണ്​ അതിലൊന്ന്​. അസി. കമീഷണര്‍ റാങ്കിലിരിക്കെ, മുണ്ടക്കയം ഗ്രൂപ്പില്‍ വള്ളിയങ്കാവ് ക്ഷേത്രത്തില്‍ ലക്ഷങ്ങള്‍ ദേവസ്വം ബോര്‍ഡിന് അടയ്ക്കാനുണ്ടായിരുന്ന ഉന്നത ഉദ്യോഗസ്ഥന്​ ശബരിമലയിൽ ഉന്നത പദവിയാണ്​ നൽകിയത്​. ശബരിമലയില്‍ ഉന്നത സ്ഥാനത്തു വരുന്നയാൾ ഒരു നടപടിയും നേരിട്ടിട്ടില്ലാത്ത ആൾ ആവണമെന്നാണു വ്യവസ്ഥ. ശബരിമലയിലെ നെയ്യ്​ തിരിമറിക്കേസില്‍ ദേവസ്വം വിജിലന്‍സ് എസ്​.പിയുടെ അന്വേഷണത്തില്‍ പ്രതിയെന്ന്​ കണ്ടെത്തിയ ആള്‍ക്ക് കൊട്ടാരക്കരയിലേക്കാണ്​ സ്ഥലം മാറ്റം. ശബരിമല തീർഥാടന കാലത്ത് നിലയ്ക്കലില്‍ അന്നദാനം നടത്തിയതുമായി ബന്ധപ്പെട്ട് ഒരു കോടിയിലേറെ രൂപയുടെ തട്ടിപ്പ് നടത്തിയെന്ന്​ ദേവസ്വം വിജിലന്‍സ് കണ്ടെത്തി പ്രതിചേർത്ത ഒരാള്‍ക്ക്​ ദേവസ്വം കമീഷണര്‍ ഓഫിസിലെ നിയമപരമായ കാര്യങ്ങൾ നോക്കുന്നതിന്‍റെ ചുമതല നല്‍കി. ഇത് കേസുകളില്‍ കൃത്രിമം കാണിക്കാനിടയാക്കുമെന്നും ആക്ഷേപം ഉയർന്നിട്ടുണ്ട്​. ബിജു ചന്ദ്രശേഖർ