നീതിന്യായ വ്യവസ്ഥ വിമർശനത്തിന് അതീതമല്ല -ജസ്റ്റിസ് സി.ടി. രവികുമാർ

കൊല്ലം: ക്രിയാത്​മകമായ വിമർശനം ഏതൊരു പ്രസ്ഥാനത്തെയും ശക്തിപ്പെടുത്തുകയേയുള്ളുവെന്നും അക്കാര്യത്തിൽ നീതിന്യായ വ്യവസ്ഥയും വ്യത്യസ്തമല്ലെന്നും സുപ്രീംകോടതി ജഡ്​ജി ജസ്റ്റിസ്​ സി.ടി. രവികുമാർ. കൊല്ലം പ്രസ് ക്ലബിന്‍റെ സുവർണ ജൂബിലി ആഘോഷ സമാപന പ്രഖ്യാപനവും നവീകരിച്ച മന്ദിര സമർപ്പണവും നിർവഹിക്കുകയായിരുന്നു അദ്ദേഹം. മാധ്യമമേഖലയിലും ചില കാര്യങ്ങളിലെങ്കിലും ക്രിയാത്മകമായ വിമർശനം ആവശ്യമാണ്​. വിചാരണ നടക്കുന്ന കേസുകളിൽ ഉൾപ്പെടെ വാർത്ത അവതരണങ്ങളിൽ മാധ്യമപ്രവർത്തകർ സ്വയം ചിന്തിച്ച്​ അതിർത്തി നിർണയിക്കണം. കേസുകളിൽ ഉൾപ്പെടുന്നവർ കുറ്റാരോപിതർ മാത്രമാണ്​. നീതിയുക്തമായ വിചാരണ അർഹിക്കുന്ന അത്തരം കു​റ്റാരോപിതരുടെ പശ്ചാത്തലം കൂടി ഉൾക്കൊണ്ടാകണം വാർത്തകളെന്നും അദ്ദേഹം പറഞ്ഞു. ജനാധിപത്യം നിലനിൽക്കുന്നത്​ മാധ്യമപ്രവർത്തകരുടെ കൂട്ടായപ്രവർത്തനത്തിന്‍റെ കൂടി കരുത്തിലാണ്​. വാർത്തകളുടെ ഭൂതവും ഭാവിയും തേടിപ്പോകുന്ന മാധ്യമപ്രവർത്തനം ഏറ്റവും സ്​തുത്യർഹമായ സേവനമാണെന്നും ജസ്റ്റിസ്​ സി.ടി. രവികുമാർ പറഞ്ഞു. നവീകരണത്തിനുൾപ്പെടെ സഹായസഹകരണങ്ങൾ നൽകിയ അസീസിയ മെഡിക്കൽ കോളജ്​ ചെയർമാൻ എം. അബ്​ദുൽ അസീസ്​, കെ.എം.എം.എൽ എം.ഡി ജെ. ച​ന്ദ്രബോസ്​, വൈസ്രോയി ഹോസ്പിറ്റൽ ഡയറക്ടർ ഗോപിനാഥപിള്ള, പ്രസ്​ക്ലബ്​ കെട്ടിടം നവീകരണ രൂപകൽപന നിർവഹിച്ച ആർകിടെക്റ്റ്​ ആബിദ്​ മുഹമ്മദ്​ ആസാദ്​ എന്നിവരെ ഉപഹാരം നൽകി ആദരിച്ചു. പ്രസ്​ ക്ലബ്​ പ്രസിഡന്‍റ്​ അജിത്​ ശ്രീനിവാസൻ അധ്യക്ഷത വഹിച്ചു. പത്രപ്രവർത്തക യൂനിയൻ സംസ്ഥാന ജനറൽ സെക്രട്ടറി ഇ.എസ്. സുഭാഷ്​, പ്രസ്​ ക്ലബ്​ സെക്രട്ടറി ജി. ബിജു, ട്രഷറർ സുജിത്​ സുരേന്ദ്രൻ എന്നിവർ സംസാരിച്ചു.