ഐ.എൽ.ഡി.എമ്മിൽ വിവിധ പദ്ധതികൾ ഉദ്ഘാടനം ചെയ്തു

തിരുവനന്തപുരം: ഐ.എൽ.ഡി.എമ്മിൽ വിവിധ പദ്ധതികളുടെ ഉദ്ഘാടനവും ഓപൺ എയർ ഓഡിറ്റോറിയത്തിന്റെ ശിലാസ്ഥാപനവും മന്ത്രി കെ. രാജൻ നിർവഹിച്ചു. ദുരന്തനിവാരണ ഉദ്യോഗസ്ഥരുടെയും പൊതുജനങ്ങളുടെയും ദുരന്താനന്തര മാനസികാഘാത ലഘൂകരണത്തിനായി ആരംഭിക്കുന്ന 'പോസ്റ്റ് ഡിസാസ്റ്റർ ട്രോമാ കൗൺസലിങ്​ സെന്റർ', പുതിയ എം.ബി.എ കോഴ്സുകൾ നടത്തുന്നതിനായി ക്ലാസ് മുറികൾ, മിനി കഫറ്റേരിയ, നവീകരിച്ച കാമ്പസ് വൈഫൈ, മികച്ച രീതിയിൽ ക്ലാസുകൾ നടത്തുന്നതിനായുള്ള ഇന്ററാക്ടിവ് ടച്ച് പാനൽ എന്നിവയാണ് ഉദ്ഘാടനം ചെയ്തത്. സർക്കാറിന്റെ വിവിധ ആവശ്യങ്ങൾക്കുതകുന്ന ഒരു ഓപൺ എയർ ഓഡിറ്റോറിയത്തിന്റെ ശിലാസ്ഥാപനവും നിർവഹിച്ചു.