തൃക്കാക്കരയില്‍ സി.പി.എം വര്‍ഗീയവാദികള്‍ക്ക് പിന്നാലെ -പ്രതിപക്ഷനേതാവ്​

തിരുവനന്തപുരം: എല്ലാ വർഗീയവാദികളുടെയും സഹായത്തോടെ തൃക്കാക്കരയിൽ യു.ഡി.എഫിന്‍റെ ഭൂരിപക്ഷം കുറക്കാനാണ്​ സി.പി.എം ശ്രമമെന്ന്​ പ്രതിപക്ഷനേതാവ്​ വി.ഡി. സതീശൻ. അതിനായി എല്ലാ വർഗീയവാദികളുടെയും അടുത്തേക്ക്​ മന്ത്രിമാരെ ഉൾപ്പെടെ അയച്ചിരിക്കുകയാണ്​. യു.ഡി.എഫിനെ തോൽപ്പിക്കാനാവില്ലെന്ന്​ അറിയാവുന്നതിനാൽ ഭൂരിപക്ഷം കുറക്കാനാണ്​ ഇപ്പോൾ നോക്കുന്നത്​. വോട്ടിനു​വേണ്ടി വര്‍ഗീയവാദികളുടെ തിണ്ണനിരങ്ങാന്‍ യു.ഡി.എഫിനെ കിട്ടില്ലെന്നും അദ്ദേഹം വാർത്തസമ്മേളനത്തിൽ പറഞ്ഞു. തിരുവനന്തപുരത്തെ വിവാദപ്രസംഗത്തിന്‍റെ പേരിലെ പി.സി. ജോർജിന്‍റെ ആദ്യ അറസ്റ്റും ജാമ്യവും തൃക്കാക്കര തെരഞ്ഞെടുപ്പിന്​ മുന്നോടിയായി സി.പി.എമ്മും മുഖ്യമന്ത്രിയും ബി.ജെ.പിയും ചേർന്ന്​ നടത്തിയ നാടകമാണ്​. അന്ന്​ ജോർജിനെ ജയിലിൽ അടച്ചിരുന്നെങ്കിൽ വിവാദപ്രസംഗം വെണ്ണലയിൽ ആവർത്തിക്കുന്നത്​ ഒഴിവാക്കാമായിരുന്നു. ഇപ്പോൾ അദ്ദേഹത്തെ അറസ്റ്റ്​ ചെയ്യാൻ കാരണമായത്​ കോടതിയുടെ ഇടപെടലാണ്​. അറസ്റ്റ്​ ചെയ്ത്​ ജോർജിനെ കഴിഞ്ഞദിവസം തിരുവനന്തപുരത്ത്​ എത്തിച്ചപ്പോഴും സംഘ്​പരിവാർ സംഘടനകൾക്ക്​ പുഷ്പപരവതാനി വിരിച്ച്​ സ്വീകരിക്കാൻ സർക്കാറും പൊലീസും ചേർന്ന്​ സൗകര്യം ഒരുക്കിക്കൊടുത്തു. വര്‍ഗീയവാദികളുടെ തിണ്ണനിരങ്ങാനില്ലെന്ന​ യു.ഡി.എഫ്​ നിലപാട്​ പൊതുസമൂഹം സ്വീകരിച്ചുവെന്ന്​ കണ്ടതോടെയാണ്​ ജോർജിന്‍റെ വിവാദ പ്രസംഗവും ആലപ്പുഴയിലെ കൊലവിളി മുദ്രാവാക്യംവിളിയും കഴിഞ്ഞ്​ ദിവസങ്ങൾക്കു ശേഷം​ പ്രതികരിക്കാൻ മുഖ്യമന്ത്രി തയാറായത്​. ഇതുവരെയും തൃക്കാക്കര ഉപതെരഞ്ഞെടുപ്പില്‍ എസ്.ഡി.പി.ഐയുമായും ആര്‍.എസ്.എസുമായും സി.പി.എമ്മും മുഖ്യമന്ത്രിയും വിലപേശുകയായിരുന്നു. ഭൂരിപക്ഷ-ന്യൂനപക്ഷ വർഗീയതകളെ പ്രോത്സാഹിപ്പിച്ച്​ സി.പി.എമ്മും മുഖ്യമന്ത്രി പിണറായി വിജയനും ചേര്‍ന്നാണ് നാടിനെ മലീമസമാക്കിയത്. പി.ഡി.പി വര്‍ഗീയ കക്ഷി അല്ലെന്നാണ് കോടിയേരി ഇപ്പോള്‍ പറയുന്നത്. 25 വര്‍ഷമായി ജമാഅത്തെ ഇസ്​ലാമിയുടെ പിന്തുണ സി.പി.എമ്മിനായിരുന്നു. ഇത്തവണ പിന്തുണ നല്‍കാതെ വന്നതോടെ അവര്‍ വര്‍ഗീയവാദികളായി. രണ്ടു കൊലപാതകങ്ങൾ നടന്ന ആലപ്പുഴയിൽ ​പ്രകടനം നടത്താൻ പോപുലര്‍ ഫ്രണ്ടിന് അനുമതി കൊടുക്കാന്‍ മുകളില്‍നിന്ന് ആരെങ്കിലും ഇടപെട്ടിട്ടുണ്ടോയെന്ന് അന്വേഷിക്കണം. പ്രകടനത്തിന് അനുമതി നല്‍കിയ എസ്.പിയുടെയും കലക്ടറുടെയും നടപടിയെക്കുറിച്ച്​ അന്വേഷിക്കണമെന്നും സതീശൻ ആവശ്യപ്പെട്ടു.