രാഷ്ട്രപതിയുടെ ഭാര്യയെ മറന്നു; ഓർമിച്ചത്​ മുഖ്യമന്ത്രി, പിറകെ നിറഞ്ഞ കൈയടിയും

തിരുവനന്തപുരം: രാഷ്ട്രപതി രാംനാഥ്​ കോവിന്ദ്​ പ​ങ്കെടുത്ത പരിപാടിയിൽ അദ്ദേഹത്തിനൊപ്പമുണ്ടായിരുന്ന ഭാര്യയെ സ്വാഗത പ്രാസംഗികനുൾപ്പെടെ പലരും മറന്നു, ഓർമിച്ചതാകട്ടെ, മുഖ്യമന്ത്രി പിണറായി വിജയനും. അതിനെ നിറഞ്ഞ കൈയടിയോടെ​ സദസ്സ്​​ വരവേൽക്കുകയും ചെയ്തു. വനിത സാമാജികരുടെ ദേശീയ സമ്മേളനത്തിന്‍റെ ഉദ്​ഘാടന വേദിയിലായിരുന്നു സംഭവം. വേദിയിൽ രാഷ്ട്രപതിക്കു​ സമീപം ഭാര്യ സവിത കോവിന്ദുമുണ്ടായിരുന്നു. അതിനടുത്ത്​ മുഖ്യമന്ത്രി പിണറായി വിജയൻ, ഗവർണർ ആരിഫ്​ മുഹമ്മദ്​ഖാൻ എന്നിവരൊക്കെയുണ്ടായിരുന്നു. എന്നാൽ, ചടങ്ങിൽ സ്വാഗതം പറഞ്ഞ മുഖ്യസംഘാടകൻ കൂടിയായ നിയമസഭ സ്പീക്കർ എം.ബി. രാജേഷ്​, പിന്നീട്​ സംസാരിച്ച മന്ത്രി ജെ. ചിഞ്ചുറാണി, പ്രതിപക്ഷനേതാവ്​ വി.ഡി. സതീശൻ എന്നിവർ വേദിയിലുണ്ടായിരുന്ന മറ്റ്​ എല്ലാവരുടെയും പേരുകൾ പറഞ്ഞെങ്കിലും രാഷ്ട്രപതിയുടെ ഭാര്യയെക്കുറിച്ച്​ പരാമർശിച്ചില്ല. എന്നാൽ, പിന്നീട്​ സംസാരിച്ച മുഖ്യമന്ത്രി പിണറായി വിജയൻ രാഷ്ട്രപതിയുടെ പേര്​ പരാമർശിച്ചശേഷം അദ്ദേഹത്തിന്‍റെ ഭാര്യയുടെ പേര്​ പറഞ്ഞു​. തുടർന്ന്​ സംസാരിച്ച ഗവർണറും ദൈവത്തിന്‍റെ സ്വന്തം നാട്ടിലേക്ക്​ രാഷ്ട്രപതിയെയും ഭാര്യയെയും സ്വാഗതം ചെയ്തു.