എൽ.ഡി.എഫ്​: അവിടെ തെരഞ്ഞെടുപ്പ്​; ഇവിടെ അണിയറയിൽ ഒരുങ്ങൽ

കെ.എസ്​. ശ്രീജിത്ത്​ തിരുവനന്തപുരം: തൃക്കാക്കര ഉപതെരഞ്ഞെടുപ്പ്​ ജയിക്കാൻ എൽ.ഡി.എഫ്​ നേതൃത്വം എല്ലാ അടവും പയറ്റുമ്പോൾ ശക്തി തെളിയിക്കാൻ അണിയറയിൽ ഒരുങ്ങുകയാണ്​ മുന്നണിയിലെ ചെറുകക്ഷികൾ. സി.പി.എമ്മിനും സി.പി.ഐക്കും കേരള കോൺഗ്രസ്​ (എം) നും പിന്നിൽ വിലപേശൽ ശക്തിയാകാൻ​ കോപ്പുകൂട്ടുകയാണ്​ എൻ.സി.പിയും ജനതാദൾ (എസ്​) ഉം. 2024 ലെ ലോക്സഭ തെരഞ്ഞെടുപ്പിൽ ഏത്​ വിധേനയും സീറ്റ്​ കരസ്ഥമാക്കാൻ ലക്ഷ്യമിട്ടാണ്​ ഇരു കക്ഷികളുടെയും നീക്കം. എൻ.സി.പിക്ക്​ ദേശീയ പാർട്ടിയെന്ന ലേബൽ മുതൽകൂട്ടാണ്​. ശരത്​ പവാർ എന്ന അതികായന്‍റെ തണലും നിലവിൽ മഹാരാഷ്ട്രയി​ല ഭരണവും ഉപയോഗിക്കുകയാണ്​ സംസ്ഥാന എൻ.സി.പി നേതൃത്വം. കോൺഗ്രസും മറ്റ്​ കക്ഷികളും​ വിടുന്നവരെ എൻ.സി.പിയിലേക്ക് ​ കൊണ്ടുവരുന്ന സംസ്ഥാന പ്രസിഡന്‍റ്​ പി.സി. ചാക്കോയുടെ ലക്ഷ്യവും പാർലമൻെറ്​ തെരഞ്ഞെടുപ്പാണ്​. കഴിഞ്ഞ ദിവസം സംസ്ഥാനത്ത്​ എത്തിയ ശരത്​ പവാർ ദേശീയ നേതൃത്വത്തിന്‍റെ ഉള്ളിലിരിപ്പ്​ പരസ്യമാക്കിയതും​ വെറുതെയല്ല. മഹാരാഷ്ട്രയിൽ തങ്ങളുടെ ജയത്തിനും എതിരാളിയുടെ തോൽവിക്കും എൻ.സി.പി സഹായം കൂടിയേ തീരൂവെന്ന്​ സി.പി.എം നേതൃത്വത്തിന്​ അറിയാം. ഇതാവും എൻ.സി.പിയുടെ വിലപേശൽ ശക്തി. നേരത്തേ പല പ്രാവശ്യം അലസിപ്പോയ എൽ.ജെ.ഡിയുമായുള്ള ലയനം യാഥാർഥ്യമാക്കിയാണ്​ ജെ.ഡി.എസ്​ ശക്തി പ്രകടനത്തിന്​ ഒരുങ്ങുന്നത്​. ഭാരവാഹിത്വത്തിന്‍റെ പേരിലാണ്​ ഇരുപാർട്ടികളും തമ്മിലുള്ള ചർച്ച ധാരണയിലെത്താതെ പോയത്​. പാർട്ടി അധ്യക്ഷ സ്ഥാനം ചോദിച്ച എൽ.ജെ.ഡിയുടെ ആവശ്യം അംഗീകരിക്കാനാകി​ല്ലെന്ന്​ ദൾ സംസ്ഥാന നേതൃത്വം അറിയിക്കുകയായിരുന്നു. എച്ച്​.ഡി. ദേവഗൗഡയും ഇതിന്​ പൂർണമായും എതിരായിരുന്നു. നേതാക്കളും പ്രവർത്തകരും ഒരുപോലെ കൊഴിഞ്ഞ്​ പോവുന്ന എൽ.ജെ.ഡിക്ക്​ വഴങ്ങേണ്ടതില്ലെന്ന നിലപാടാണ്​ ജെ.ഡി.എസിന്​. ​ ഒടുവിൽ നടന്ന ഉഭയകക്ഷി ചർച്ചയിൽ ദൾ- എൽ.ജെ.ഡി ലയനത്തിന്​ ധാരണയിലെത്തി. ഇതുപ്രകാരം പത്ത്​ സംസ്ഥാന ഭാരവാഹിത്വം പരസ്പരം പങ്കുവെക്കും. അധ്യക്ഷ സ്ഥാനം എൽ.ജെ.ഡി​ കൈവശം വെക്കും. സീനിയർ വൈസ്​ പ്രസിഡന്‍റ്​, സെക്രട്ടറി ജനറൽ സ്ഥാനം എൽ.ജെ.ഡിക്കും ലഭിക്കും. ദളിന്​ രണ്ട്​ എം.എൽ.എമാരും എൽ.ജെ.ഡിക്ക്​ ഒന്നുമാണ്​ ഉള്ളത്​. ലയനശേഷം മന്ത്രിസ്ഥാനം പങ്കുവെക്കുന്നതിൽ ചർച്ച നടന്നിട്ടില്ല. ജൂൺ മൂന്നിന്​ ചേരുന്ന എൽ.ജെ.ഡി സംസ്ഥാന സമിതി യോഗത്തിന്‍റെ അനുമതിക്ക്​ ശേഷമാവും ലയനം.