കന്യാകുമാരി റെയിൽവേ സ്റ്റേഷൻ പുനർവികസനം: കല്ലിടൽ പ്രധാനമന്ത്രി നിർവഹിച്ചു

കന്യാകുമാരി: തമിഴ്നാട്ടിൽ അഞ്ച് റെയിൽവേ സ്റ്റേഷനുകളിൽ നടപ്പാക്കുന്ന പുനർവികസന പദ്ധതിയിൽ ഉൾപ്പെടുത്തി കന്യാകുമാരി റെയിൽവേ സ്റ്റേഷനും നവീകരിക്കുന്നു. ഇതിന്റെ തറക്കല്ലിടൽ ചടങ്ങ് പ്രധാനമന്ത്രി നരേന്ദ്ര മോദി ചെന്നൈയിൽനിന്ന്​ വിഡിയോ കോൺഫറൻസ് മുഖേന നിർവഹിച്ചു. കന്യാകുമാരി റെയിൽവേ സ്റ്റേഷനിൽ നടന്ന ചടങ്ങിൽ മന്ത്രി ടി. മനോതങ്കരാജ്, എ. വിജയകുമാർ എം.പി, എം.എൽ.എ. ദളവായ് സുന്ദരം, ടൗൺ പഞ്ചായത്ത് പ്രസിഡന്റ് കുമരി സ്റ്റീഫൻ, തിരുവനന്തപുരം റെയിൽവേ ഡിവിഷനൽ മാനേജർ, ചീഫ് എൻജിനീയർ കൺസ്ട്രക്​ഷൻ നിരഞ്ജൻ നായിക് ഉൾപ്പെടെയുള്ളവർ പങ്കെടുത്തു. 1803 കോടി രൂപ ചെലവിലാണ് കന്യാകുമാരി, കാട് പാടി, മധുര, രാമേശ്വരം, ചെന്നൈ എഴുമ്പൂർ സ്റ്റേഷനുകളിൽ പുനർവികസന നിർമാണ പ്രവർത്തനങ്ങൾ നടക്കുക. ഇതിൽ കന്യാകുമാരിയിൽ വിവേകാനന്ദ സ്മൃതി മണ്ഡപത്തിന്റെ മാതൃകയിലാണ് സ്റ്റേഷന്റെ മുഖപ്പ് നവീകരിക്കുക.