ജസ്റ്റിസ്​ പർദിവാലയുടെ നിയമനം പദവിയിൽനിന്ന്​ നീക്കണമെന്ന ആവശ്യം നിലനിൽക്കെ -ജസ്റ്റിസ്​ ചന്ദ്രു

തിരുവനന്തപുരം: ജസ്റ്റിസ്​ ജംഷാദ്​ ബി. പർദിവാലയെ നീക്കം ചെയ്യണമെന്ന് ആവശ്യപ്പെട്ട്​​ 58 എം.പിമാർ ഒപ്പിട്ട കരട്​ പ്രസ്താവന ​പാർലമെന്‍റിന്‍റെ പരിഗണനയിലിരിക്കെയാണ്​ സുപ്രീംകോടതി ജഡ്​ജിയായി അദ്ദേഹത്തെ നിയമിച്ചതെന്ന്​ മദ്രാസ്​ ഹൈകോടതി മുൻ ജഡ്​ജി കെ. ചന്ദ്രു. പട്ടികജാതി ക്ഷേമസമിതി സംസ്ഥാന സമ്മേളനത്തിന്‍റെ ഉദ്​ഘാടന വേളയിൽ സംസാരിക്കുകയായിരുന്നു അദ്ദേഹം. രണ്ടു വർഷം മുമ്പ്​ ഗുജറാത്ത്​ ഹൈകോടതി ജഡ്​ജിയായിരിക്കെ, സംവരണം അവസാനിപ്പിക്കേണ്ട കാലം കഴിഞ്ഞെന്ന്​ വിധിച്ചയാളാണ്​ ജസ്റ്റിസ്​ പർദിവാല. സാമൂഹികനീതിക്കുവിരുദ്ധമായ വിധിയാണിത്​. ഇന്ത്യൻ ഭരണഘടന ഉയർത്തിപ്പിടിക്കേണ്ട പദവിയിലിരിക്കുന്ന ഒരാളിൽനിന്നാണ്​ ഈ വിധിയുണ്ടായത്​. വിധി തന്‍റെ ഉയർച്ചക്ക്​ വിഘാതമാകുമെന്ന്​ കണ്ട പർദിവാല സുവോമോട്ടോ ഉത്തരവിലൂടെ വിവാദ ഖണ്ഡിക നീക്കംചെയ്തതായി വിധിച്ചു. എന്നാൽ, കോടതിയിൽ ഒരിക്കൽ വിധിച്ച ഏത്​ ഉത്തരവും രേഖകളിൽ കാണുമെന്നതാണ്​ വസ്തുത. സീനിയർ ജഡ്​ജിയോ ഹൈകോടതി ചീഫ്​ ജസ്റ്റിസോ ആകാത്ത പർദിവാലയെ സുപ്രീംകോടതിയിലേക്ക്​ ഉയർത്തി. അതേസമയം, കേരള ഹൈകോടതി ചീഫ്​ ജസ്റ്റിസ്​ എസ്​. മണികുമാറിന്​ 16 വർഷത്തെ പരിചയവും രണ്ടര വർഷം ചീഫ്​ ജസ്റ്റിസ്​ ആയിരുന്നിട്ടും പരിഗണിച്ചില്ല. അദ്ദേഹം പട്ടികജാതി സമുദായത്തിൽപെട്ടയാളാണ്​. ജുഡീഷ്യൽ സർവിസിൽ സീനിയറുമാണ്. എ​പ്പോഴൊക്കെ മർദിത ജാതിയിൽപെട്ടവർ തഴയപ്പെടുന്നതിനെകുറിച്ച ചോദ്യം ഉയരുന്നുവോ അപ്പോഴൊക്കെ യോഗ്യതയുള്ളവർ വരട്ടെ അപ്പോൾ പരിഗണിക്കാമെന്നാണ്​ മറുപടി. ഇപ്പോൾ യോഗ്യതയുള്ളവരുണ്ട്​. പരിഗണിച്ചില്ല. ജസ്റ്റിസ്​ പർദിവാല 2023 മുതൽ രണ്ടു​ വർഷം ഇന്ത്യൻ ചീഫ്​ ജസ്റ്റിസ്​ ആവും. സംവരണത്തെ എതിർക്കുന്നവർക്ക്​ ഉന്നത പദവികളിൽ​ നിയമനം നൽകുമ്പോൾ ചവിട്ടിമെതിക്കപ്പെട്ട സമുദായത്തിൽപെട്ടവർ ശിക്ഷിക്കപ്പെടുകയാണെന്നും അദ്ദേഹം പറഞ്ഞു. എ.കെ.ജി സെന്‍റർ ഓഡിറ്റോറിയത്തിൽ നടന്ന സമ്മേളനം സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണൻ ഉദ്​ഘാടനം ചെയ്​തു. മന്ത്രി കെ. രാധാകൃഷ്ണൻ. പി.കെ.എസ്​ സംസ്ഥാന സെക്രട്ടറി കെ. സോമപ്രസാദ്​, പ്രസിഡന്‍റ്​ എസ്​. അജയകുമാർ, എം. വിജയകുമാർ എന്നിവർ സംബന്ധിച്ചു.