ഇസ്​ലാമോഫോബിയ: ഓർഡിനൻസ്​ കൊണ്ടു​വരണം -സോളിഡാരിറ്റി

തിരുവനന്തപുരം: ഇസ്​ലാമോഫോബിയ കുറ്റകൃത്യമായി പ്രഖ്യാപിച്ച്​ സംസ്ഥാന സർക്കാർ ഓർഡിനൻസ്​ കൊണ്ടുവരണ​മെന്ന്​ സോളിഡാരിറ്റി യൂത്ത്​ മൂവ്​മെന്‍റ്​ സംസ്ഥാന ഭാരവാഹികൾ വാർത്തസ​മ്മേളനത്തിൽ ആവശ്യപ്പെട്ടു. ഇസ്​ലാമോഫോബിയ കടുത്ത ശിക്ഷ ലഭിക്കുന്ന കുറ്റമായാലേ സംഘ്​പരിവാറും തൽപര കക്ഷികളും പരത്തുന്ന മുസ്​ലിം വിരുദ്ധ കാമ്പയിനുകളും അക്രമങ്ങളും തടയാനാകൂ. ഇത്തരം നിയമങ്ങൾ ഇല്ലാത്തതുകൊണ്ട്​ കൂടിയാണ്​ അനന്തപുരി ഹിന്ദു മഹാസമ്മേളനത്തിൽ പ്രഭാഷകർക്ക്​ പരസ്യമായി വർഗീയ വിഷം ചീറ്റാൻ ധൈര്യമുണ്ടായതെന്നും അവർ പറഞ്ഞു. ഈ ആവശ്യമുയർത്താൻ കേരളത്തിലെ രാഷ്ട്രീയ പാർട്ടികളും ആക്ടിവിസ്റ്റുകളും പൊതുജനവും മുന്നോട്ടുവരണമെന്ന്​ സംസ്​ഥാന പ്രസിഡന്‍റ്​ നഹാസ്​ മാള ആവശ്യപ്പെട്ടു. ഇസ്​ലാമോഫോബിയ കുറ്റകൃത്യമായി പ്രഖ്യാപിക്കുക എന്ന ആവശ്യമുന്നയിച്ച്​ കാസർകോട്ടുനിന്ന്​ മേയ്​ അഞ്ചിന്​ തുടങ്ങിയ യൂത്ത്​ കാരവൻ 13 ജില്ലകളിലെ പര്യടനത്തിനുശേഷം തിരുവനന്തപുരത്ത്​ സമാപിച്ചു. മേയ്​ 21, 22 തീയതികളിൽ എറണാകുളത്ത്​ നടക്കുന്ന സോളിഡാരിറ്റി സംസ്ഥാന സമ്മേളനത്തി‍ൻെറ ഭാഗമായാണ്​ യൂത്ത്​ കാരവൻ സംഘടിപ്പിച്ചത്​. സംസ്ഥാന ജനറൽ സെക്രട്ടറി പി.പി. ജുമൈൽ, വൈസ്​ പ്രസിഡന്‍റ്​ സി.ടി. സുഹൈബ്​, ജില്ല പ്രസിഡന്‍റ്​ എം. ശാഫി, സംസ്ഥാന സമിതി അംഗം സക്കീർ നേമം എന്നിവരും വാർത്തസമ്മേളനത്തിൽ പ​ങ്കെടുത്തു.