തുടർ പരിശോധനകളില്ലാത്തത്​ തിരിച്ചടി; മീനിലെ രാസവസ്തു കണ്ടെത്താൻ നൽകുമെന്ന്​ പറഞ്ഞ 'സ്​ട്രിപ്പും' കാണാനില്ല

തിരുവനന്തപുരം: ഗുരുതര ആരോഗ്യ​പ്രശ്നങ്ങൾ​ക്ക്​ കാരണമാകാൻ സാധ്യതയുള്ള പഴകിയതും കേടായതുമായ ഭക്ഷ്യവസ്തുക്കളുടെ പരിശോധനകൾ ഇപ്പോഴും പ്രഹസനം. ഭക്ഷ്യവിഷബാധ പോലുള്ള സംഭവങ്ങൾ റിപ്പോർട്ട്​ ചെയ്യുമ്പോൾ മാത്രം ഭക്ഷ്യസുരക്ഷ വിഭാഗം നടത്തുന്ന പരിശോധനകൾ കൊണ്ട്​ പ്രയോജനമില്ലെന്ന വാദമാണ്​ ഉയരുന്നത്​. 'ഓപറേഷൻ സാഗർ റാണി' യുടെ ഭാഗമായി മൂന്നുവർഷം മുമ്പ്​ കേടായ മത്സ്യം പരിശോധിക്കാൻ രണ്ടു രൂപക്ക്​ പൊതുജനങ്ങൾക്ക്​ '​സ്​ട്രിപ്​​' നൽകുമെന്ന്​ പറഞ്ഞതും പാഴ്​വാക്കായി. ഭക്ഷ്യസുരക്ഷ വിഭാഗത്തിന്‍റെ നേതൃത്വത്തിൽ ഹോട്ടലുകൾ,​ വ്യാപാര സ്ഥാപനങ്ങൾ, മാർക്കറ്റുകൾ, ചെക്​പോസ്റ്റുകൾ തുടങ്ങിയവ കേന്ദ്രീകരിച്ച്​ നടത്തേണ്ട തുടർപരിശോധനകൾ ഇപ്പോൾ ഒരിടത്തും കാര്യക്ഷമമല്ല. അയൽ സംസ്ഥാനങ്ങളിൽനിന്ന്​ രാസവസ്​തുക്കൾ കലർന്ന മത്സ്യം കേരളത്തിലേക്കെത്തുന്നെന്ന്​ കണ്ടെത്തിയതിന്‍റെ അടിസ്ഥാനത്തിലാണ്​ 2018-19ൽ 'ഓപറേഷൻ സാഗർ റാണി' എന്ന പേരിൽ ഭക്ഷ്യസുരക്ഷ വിഭാഗം പരിശോധന കർശനമാക്കിയത്​. മാർക്കറ്റുകൾ, ചെക്​പോസ്​റ്റുകൾ, ഐസ്​ പ്ലാന്‍റുകൾ തുടങ്ങിയവ കേന്ദ്രീകരിച്ചായിരുന്നു​ പ്രധാന പരിശോധന. എന്നാൽ, അതെല്ലാം പിന്നീട്​ നിലച്ചു. അപ്പോഴാണ്​ കൊച്ചിയിലെ സെ​ൻട്രൽ ഇൻസ്റ്റിറ്റ്യൂട്ട്​ ഓഫ്​ ഫിഷറീസ്​ ടെക്​നോളജി (സിഫ്​റ്റ്​) വികസിപ്പിച്ച 'സ്​ട്രിപ്​​' മത്സ്യത്തിന്‍റെ ഗുണമേന്മ പരിശോധിക്കാൻ കൊണ്ടുവന്നത്​. അതും വേണ്ടപോലെ മുന്നോട്ട്​ പോയില്ല. പരിശോധനകൾ​ നിലച്ചതോടെ കേടായതും രാസവസ്​തുക്കൾ കലർന്നതുമായ മത്സ്യങ്ങൾ വ്യാപകമായി കേരളത്തിലെത്തുന്ന സ്ഥിതിയുണ്ടായി. ഇപ്പോൾ 'നല്ല ഭക്ഷണം നാടിന്‍റെ അവകാശം' 'ഓപറേഷൻ മത്സ്യ' 'ഓപറേഷന്‍ ജാഗറി' എന്നീ കാമ്പയിനുകളാണ്​ നടന്നുവരുന്നത്​. നല്ല ഭക്ഷണം നാടിന്‍റെ അവകാശം എന്നതിന്‍റെ ഭാഗമായി കഴിഞ്ഞ 10 ദിവസങ്ങളിലായി 2373 പരിശോധനകളാണ് നടത്തിയത്. ഓപറേഷൻ മത്സ്യയുടെ ഭാഗമായി ഇതുവരെ 6361 കിലോഗ്രാം പഴകിയതും രാസവസ്തുക്കള്‍ കലര്‍ന്നതുമായ മത്സ്യം നശിപ്പിച്ചു. ഓപറേഷന്‍ ജാഗറിയുടെ ഭാഗമായി ശർക്കരയാണ്​ പരിശോധിച്ചത്​. ഗുരുതര ക്രമക്കേട്​ കണ്ടെത്തിയ സ്ഥാപനങ്ങൾ അടച്ചുപൂട്ടുമെന്നാണ്​ പറയുന്നത്​. ശാശ്വതമായ അടച്ചുപൂട്ടൽ ഇല്ലെന്നതാണ്​ യാഥാർഥ്യം. പൂട്ടുന്ന സ്ഥാപനങ്ങൾക്കെല്ലാം നോട്ടീസ്​ നൽകി തിരുത്തലാണ്​ നിർദേശിക്കുന്നത്​. ദിവസങ്ങൾ കഴിയുമ്പോൾ പരിശോധനകൾ നിലക്കുന്നതോടെ ഈ സ്ഥാപനങ്ങളെല്ലാം പ​ഴയപടിയാകുകയാണ്​ പതിവ്​. എ. സക്കീർ ഹുസൈൻ