മലക്കപ്പാറയിൽ വനപാലകർക്ക് നേരെ കാട്ടാനയുടെ പരാക്രമം

അതിരപ്പിള്ളി: മലക്കപ്പാറയിൽ കാട്ടാനയുടെ പരാക്രമം വനപാലകർക്ക് നേരെയും. ആനക്കയം മേഖലയിലാണ് കഴിഞ്ഞ ദിവസം കാട്ടാന അക്രമാസക്തനായത്. വഴിയിൽ കിടന്ന വനം വകുപ്പിന്‍റെ ജീപ്പ് തട്ടി മറിച്ചിടാൻ ശ്രമിച്ചു. കുറച്ചു ദിവസങ്ങളായി സ്ഥിരമായി ഈ കൊമ്പൻ കാനനപാതയിൽ ആക്രമണ ഭീഷണി ഉയർത്തുന്നുണ്ട്.

ഏതാനും ദിവസം മുമ്പ് കെ.എസ്.ആർ.ടി.സി ബസ് തടഞ്ഞു. ആരെയും ആക്രമിച്ച് പരിക്കേൽപ്പിക്കുകയോ ഗുരുതര പ്രശ്നങ്ങൾ സൃഷ്ടിക്കുകയോ ചെയ്തിട്ടില്ലെങ്കിലും ആനമല പാതയിൽ ഈ ആനയുടെ സാന്നിധ്യം ആശങ്ക പരത്തുന്നുണ്ട്.

ആനക്ക് മദപ്പാടുണ്ടോ എന്ന് പരിശോധിക്കാനാണ് വനപാലകർ എത്തിയത്. വനപാലകരുടെ ജീപ്പിനെ തട്ടിമറിച്ചിടാൻ ആന ശ്രമിച്ചു. വനപാലകർ ജീപ്പിന് പുറത്തായിരുന്നതിനാൽ രക്ഷപ്പെടുകയായിരുന്നു. ഇവർ ബഹളമുണ്ടാക്കി ആനയെ പിന്തിരിപ്പിച്ചു.