യുവാവ് കെട്ടിടത്തിൽനിന്ന് വീണ് മരിച്ച സംഭവം: രണ്ടുപേർ അറസ്​റ്റിൽ

വടക്കാഞ്ചേരി: കെട്ടിടത്തിന്​ മുകളിൽനിന്ന് വീണ്​ യുവാവ് മരിച്ച സംഭവത്തിൽ രണ്ടുപേർ അറസ്​റ്റിൽ. വടക്കാഞ്ചേരി സ്വദേശി കോളിങ്​സ് ജേക്കബ്​ (32) മരിച്ച കേസിൽ സുഹൃത്തുക്കളായ കുമരനെല്ലൂർ ഒന്നാംകല്ല് സ്വദേശി വല്ലത്തുകാരൻ വീട്ടിൽ ജീൻസ് (29), കാഞ്ഞിരക്കോട് പുതിയാരംപറമ്പത്ത് വീട്ടിൽ സനൽ (29) എന്നിവരാണ്​ പിടിയിലായത്​.

മേയ്​ 29ന് രാത്രിയാണ് കോളിങ്​സിനെ വടക്കാഞ്ചേരി എംപ്ലോയ്മെൻറ് എക്സ്ചേഞ്ച് സ്ഥിതി ചെയ്യുന്ന കെട്ടിടത്തിനു സമീപം പാതയോരത്ത് ദുരൂഹസാഹചര്യത്തിൽ അബോധാവസ്ഥയിൽ കണ്ടെത്തിയത്. തലക്ക്​ ഗുരുതര പരിക്കുള്ളതിനാൽ ആശുപത്രിയിൽ പ്രവേശിപ്പിച്ചെങ്കിലും രക്ഷിക്കാനായില്ല.

തലേദിവസം സുഹൃത്തുക്കളായ പ്രതികളും ഇയാളും സമീപത്തെ വാടകമുറിയിൽ ഒത്തുകൂടിയിരുന്നതായി പൊലീസിന്​ വിവരം ലഭിച്ചിരുന്നു. ഇതിനിടയിൽ എപ്പോഴോ മദ്യലഹരിയിലായ യുവാവ് താഴെ വീണിരിക്കാനാണ് സാധ്യതയെന്നാണ് വിലയിരുത്തൽ. അറസ്​റ്റിലായവർക്കെതിരെ മനഃപൂർവമല്ലാത്ത നരഹത്യക്കാണ് കേസെടുത്തതെന്ന് പൊലീസ് അറിയിച്ചു. വടക്കാഞ്ചേരി സി.ഐ പി.കെ. സാബുവി​െൻറ നേതൃത്വത്തിൽ എസ്.ഐമാരായ എസ്. അനീഷ്‌, കെ.ആർ. വിനു, സീനിയർ സിവിൽ പൊലീസ് ഓഫിസർ എ.വി. സജീവ് എന്നിവരാണ്​ പ്രതികളെ പിടികൂടിയത്.