വലപ്പാട് ആറാം വാർഡിൽ വിജയഗോൾ നേടാൻ ഭരതൻ

വലപ്പാട്: ജനങ്ങളുടെ പ്രശ്​നങ്ങൾ മികച്ച പന്തടക്കത്തിന്​ സമാനം കൈകാര്യം ചെയ്യാനാവുമെന്ന​ പ്രതീക്ഷയുമായി തെരഞ്ഞെടുപ്പിൽ മത്സരിക്കുകയാണ്​ ഭരതൻ എന്ന കാൽപന്തു കളിക്കാര​ർ. തെരഞ്ഞെടുപ്പിൽ നാമനിർദേശ പത്രിക സമർപ്പണം പുരോഗമിക്കുമ്പോൾ വലപ്പാട് ഗ്രാമപഞ്ചായത്ത് ആറാം വാർഡിൽ (ആനവിഴുങ്ങി) സ്വതന്ത്ര സ്ഥാനാർഥിയായാണ്​ ഫുട്ബാളർ ഭരതൻ​ പത്രിക നൽകിയത്​. മൂന്നു മുന്നണികളുടെയും പ്രവർത്തകരുമായി ഹൃദയബന്ധമുള്ളതിനാൽ വിജയ പ്രതീക്ഷയിലാണ്.​

മുതിർന്നവരും ചെറുപ്പക്കാരുമടക്കം ഫുട്​ബാൾ കമ്പക്കാർ കന്നിയങ്കത്തിൽ പിന്തുണക്കും. ബൊക്കാ ജൂനിയേഴ്സ്, വി.എഫ്.എ എന്നിവയിലൂടെ കളി തുടങ്ങിയ ഭരതൻ ജൂനിയർ-^സീനിയർ സ്കൂൾ ടീം, ജൂനിയർ കേരള ടീം അംഗമായി. കാലിക്കറ്റ് യൂനിവേഴ്സിറ്റി, ഓൾ ഇന്ത്യ യൂനിവേഴ്സിറ്റി മത്സരത്തിൽ (2013^-14) മികച്ച കളിക്കാരനായി തിരഞ്ഞെടുക്കപ്പെട്ടു.

ചെറുതും വലുതുമായ നിരവധി വിദേശ മത്സരങ്ങളിലും ഭരതൻ ത​െൻറ പ്രതിഭ തെളിയിച്ചു. നല്ല ഒരു കായിക സംസ്കാരത്തോടൊപ്പം എല്ലാ ജനങ്ങളുടെയും ജീവിതപുരോഗതിക്കായി നാടി​െൻറ സമഗ്ര വികസനത്തിനാണ് ജനങ്ങളുടെ ആവശ്യപ്രകാരം മത്സരരംഗത്തിറങ്ങുന്നതെന്ന് ഭരതൻ പറഞ്ഞു. ആനവിഴുങ്ങി കോളനിയിലെ നിർധനരായ തെങ്ങുകയറ്റ തൊഴിലാളികളാണ് ഈ കളിമിടുക്കി​െൻറ കൂട്ടുകാരന് കെട്ടിവെക്കാനുള്ള തുക കൈമാറിയത്.