തൃശൂരി​െൻറ റമദാൻ രുചിപ്പെരുമ ഇക്കുറിയില്ല

തൃശൂർ: തൃശൂരി​​െൻറ തനത്​ നോമ്പുതുറ രുചിപ്പെരുമ ഇക്കുറിയില്ല. 40 വർഷമായി ചെട്ടിയങ്ങാടി ഹനഫി മസ്​ജിദിൽ ആയിരങ്ങ ൾ നോമ്പുതുറക്കുന്ന സവിശേഷ വിഭവമായ മസാലക്കഞ്ഞിയാണ്​ കോവിഡ്​ പശ്ചാത്തലത്തിൽ ഒഴിവാക്കിയത്​​.

തിരുനൽവേലി സ്വദേശിയായ ഖത്തീബ് ശൈഖ് മിസ്​ബാഹിയാണ് പ്രത്യേക രസക്കൂട്ടുള്ള കഞ്ഞി തൃശൂരിന്​ പരിചയപ്പെടുത്തിയത്​. അന്ന്​ മുതൽ അദ്ദേഹം രഹസ്യമായി നൽകിയ രസക്കൂട്ടിലാണ്​ കഞ്ഞി ഒരുക്കുന്നത്​. മുൻ മുക്രി കെ.ബി. സിദ്ദീഖ് ഹാജി 34 വർഷം മുമ്പ് കൈപിടിച്ച് പള്ളിയിലേക്കെത്തിച്ച റഫീഖാണ്​ കഴിഞ്ഞ വർഷം വരെ കഞ്ഞി തയാറാക്കിയിരുന്നത്​. ഏറെ സ്വാദിഷ്​ടമായ രഹസ്യ രസക്കൂട്ടിപ്പോഴും റഫീഖിന് മാത്രം സ്വന്തമാണ്. തൊഴിലിനപ്പുറം തനിക്ക്​ ബറകത്ത്​ കൂടി ലഭിക്കുന്ന കഞ്ഞി ഒരുക്കാൻ ഇക്കുറി കഴിയാത്ത വിഷമത്തിലാണ്​ ഒാ​ട്ടോ തൊഴിലാളി കൂടിയായ റഫീഖ്​.

1500ഓളം പേരാണ്​ ദിവസവും കഞ്ഞി കുടിക്കാനെത്തിയിരുന്നത്​. 90 കിലോ ബസുമതി അരിയാണ് കഞ്ഞിക്കായി ദിനേന ഉപയോഗിച്ചിരുന്നത്​. വിശേഷ ദിവസങ്ങളിൽ ആട്ടിറച്ചി ചേർത്ത ബിരിയാണിക്കഞ്ഞിയാണ്​ ഒരുക്കിയിരുന്നത്​.