ബി.ജെ.പിയിൽ ചേരി; മൂന്നുപേർ ഭരണപക്ഷത്തിനൊപ്പം

തൃശൂർ: ജില്ല നേതൃത്വത്തി​െൻറ വിപ്പ് തള്ളി സംസ്ഥാന വൈസ് പ്രസിഡൻറ്​ കൂടിയായ എം.എസ്. സമ്പൂർണയടക്കം കോർപറേഷനിലെ മൂന്ന് ബി.ജെ.പി കൗൺസിലർമാർ ഹൈമാസ്​റ്റ്​ വിഷയത്തിൽ ഭരണപക്ഷ അനുകൂല നിലപാടെടുത്തതോടെ ബി.ജെ.പിയിൽ ചേരി പരസ്യമായി. പൊതുമേഖല സ്ഥാപനത്തിന്​ കരാർ നൽകാനുള്ള തീരുമാനത്തിനൊപ്പം ഉറച്ചുനിൽക്കണമെന്നാണ് ബി.ജെ.പി ജില്ല പ്രസിഡൻറ്​ നൽകിയ വിപ്പ്.

എന്നാൽ, പാർലമെൻററി പാർട്ടി നേതാവ് എം.എസ്. സമ്പൂർണ, പൂർണിമ സുരേഷ്, കെ. മഹേഷ് എന്നിവർ ഒപ്പിട്ട് കൗൺസിലിന്​ നൽകിയ കത്തിൽ കോർപറേഷന്​ സാമ്പത്തിക നഷ്​ടമുണ്ടാകാത്ത വിധത്തിൽ കോടതി ഉത്തരവ് പാലിച്ചു നടപ്പാക്കാനാണു പറയുന്നത്. ബി.ജെ.പിയിലെ മറ്റു മൂന്നു കൗൺസിലർമാർ വിപ്പ് അനുസരിച്ചുള്ള നിലപാട് സ്വീകരിക്കുകയും ചെയ്തു. ബി.ജെ.പി കൗൺസിലർമാർ മൂന്ന് വീതം രണ്ട് ഭാഗങ്ങളിലായെങ്കിലും വിയോജിപ്പുള്ളവരാണ് കൂടുതൽ.

ഈ സാഹചര്യത്തിൽ വോട്ടിങ്​ ആവശ്യമുയർന്നെങ്കിലും നടന്നില്ല. ഭരണപക്ഷത്തുനിന്ന് രണ്ട് പേർ എതിർക്കുകയും രണ്ട് പേർ എത്താതിരിക്കുകയും ചെയ്തതോടെ പ്രതിപക്ഷ നിരയേക്കാൾ കുറവായിരുന്നു ഭരണപക്ഷ കക്ഷി നില. ഭൂരിപക്ഷ തീരുമാനമില്ലാത്തതിനാൽ കൗൺസിൽ തീരുമാനം നിയമവിരുദ്ധമാണെന്ന നിലപാടിലാണ് പ്രതിപക്ഷം.