മെ​ല്ലെപ്പോക്കിനെതിരെ നിലപാട്​ കടുപ്പിച്ച്​ സർക്കാർ; മൂന്ന്​ ജില്ല സപ്ലൈ ഓഫിസർമാർ അവധിയിലേക്ക്​

തൃശൂർ: പൊതുവിതരണ വകുപ്പ്​ മന്ത്രിയും ഡയറക്ടറും നിലപാട്​ കടുപ്പിച്ചതോടെ മൂന്ന്​ ജില്ലകളിലെ ജില്ല സപ്ലൈ ഓഫിസർമാർ അവധിയിലേക്ക്​. തൃശൂർ, ഇടുക്കി, വയനാട്​ ജില്ല ഓഫിസർമാരാണ് വിരമിക്കുന്നതിന്​ മുമ്പുള്ള അവധിയിൽ പ്രവേശിക്കുന്നത്​.​ ഇതിൽ തൃശൂർ ജില്ല സപ്ലൈ ഓഫിസർ ​ഇതിനകം അവധിയെടുത്തു.

സർക്കാറിന്‍റെ ​പ്രഖ്യാപിത പദ്ധതികളിൽ കൃത്യമായ നടപടി സ്വീകരിക്കാത്തവരെ മന്ത്രിയും ഡയറക്ടറും രൂക്ഷമായി വിമർശിച്ചിരുന്നു. എൻ.എഫ്​.എസ്​.എ ഗോഡൗൺ സ്ഥാപിക്കാൻ​ ഭൂമി കണ്ടെത്തുന്ന കാര്യത്തിൽ തുടരുന്ന മെല്ലെപ്പോക്കും 'സുഭിക്ഷ' ഹോട്ടലുകൾ തുടങ്ങുന്നതിലുണ്ടായ കാലതാമസവും സർക്കാറിന്‍റെ പ്രതിച്ഛായക്ക്​ മങ്ങലേൽപിച്ചിരുന്നു. വിഷയത്തിൽ ഡയറക്ടറും മന്ത്രിയും ജില്ല സപ്ലൈ ഓഫിസർമാരോട്​ കയർക്കുന്ന സാഹചര്യവുമുണ്ടായി. കഴിഞ്ഞദിവസം വിളിച്ച വിഡിയോ കോൺഫറൻസിൽ ഹോട്ടലുമായി ബന്ധപ്പെട്ട ചോദ്യത്തിന്​ കൃത്യമായ മറുപടി നൽകാത്ത പത്തനംതിട്ട, വയനാട്​ ജില്ല സപ്ലൈ ഓഫിസർമാരോട്​ മ​ന്ത്രി രൂക്ഷമായി പ്രതികരിച്ചിരുന്നു.

നേരത്തേ താലൂക്ക്​ സപ്ലൈ ഓഫിസർമാർ ചെയ്തിരുന്ന ഇത്തരം കാര്യങ്ങൾ വിരമിക്കൽ അടുത്ത സാഹചര്യത്തിൽ തലവേദനയാവുന്നതാണ്​ അവധിയിൽ പ്രവേശിക്കാൻ ഇവരെ പ്രേരിപ്പിക്കുന്നത്​. അതേസമയം, ഡയറക്ടർ മോശമായി പെരുമാറുന്നതായും ആക്ഷേപമുണ്ട്​. വിഡിയോ കോൺഫറൻസുകളിൽ കീഴുദ്യോഗസ്ഥരുടെ മുന്നിൽ മോശം പദപ്രയോഗമടക്കം സ്ഥിരമാണത്രേ. 30 മുതൽ 35 വർഷം വരെ സർവിസുള്ളരെ​ ചെറുപ്രായക്കാരനായ ഡയറക്ടർ അധിക്ഷേപിക്കുന്നെന്നാണ്​ ഉദ്യോഗസ്ഥ സംഘടനകളുടെ ആരോപണം.

സംസ്ഥാന ഉപഭോക്തൃ കമീഷനിലെ സെക്രട്ടറി ആൻഡ്​ രജിസ്​ട്രാർ തസ്തിക വകുപ്പിൽനിന്ന്​ സെക്രട്ടേറിയറ്റ് ഉദ്യോഗസ്ഥർക്ക് കൈമാറി ഉത്തരവിറക്കിയതിലും ജീവനക്കാർക്ക്​ അമർഷമുണ്ട്. വകുപ്പിലെ റേഷനിങ് കൺട്രോളർ, ഡെപ്യൂട്ടി കൺട്രോളർ തസ്തികയിലെ മുതിർന്ന ഉദ്യോഗസ്ഥർക്ക് നൽകിയിരുന്ന പദവി സെക്രട്ടേറിയറ്റിലെ മുതിർന്ന ഉദ്യോഗസ്ഥന് നൽകിയതിനെതിരെ ഉദ്യോഗസ്ഥരുടെ വാട്​സ്​ആപ് ഗ്രൂപ്പുകളിൽ പ്രതിഷേധ കുറിപ്പുകൾ വന്നിരുന്നു.