എസ്.ഐ.ആർ കരട് വോട്ടർ പട്ടിക ജില്ലയിൽ രണ്ടര ലക്ഷം പേർ പുറത്ത്

തൃശൂർ: വോട്ടർപട്ടിക പുതുക്കലിന്റെ ഭാഗമായുള്ള കരട് വോട്ടർപട്ടിക പ്രസിദ്ധീകരിച്ചു. ജില്ലയിലെ 13 നിയോജകമണ്ഡലങ്ങളിലായി ആകെ 24,02,432 വോട്ടർമാരാണ് പട്ടികയിലുള്ളത്. ഇതിൽ 12,40,241 സ്ത്രീകളും 11,62,170 പുരുഷന്മാരും 21 ട്രാൻസ്ജെൻഡറുകളും ഉൾപ്പെടുന്നു. കലക്ടറുടെ ചേംബറിൽ നടന്ന ചടങ്ങിൽ കലക്ടർ അർജുൻ പാണ്ഡ്യൻ കരട് പട്ടികയുടെ പ്രകാശനം നിർവഹിച്ചു. തൃശൂർ മണ്ഡലത്തിലെ ബൂത്ത് ലെവൽ ഓഫിസർമാർക്ക് പട്ടിക നൽകിക്കൊണ്ടാണ് വിതരണോദ്ഘാടനം നടന്നത്.

പുതിയ കരട് വോട്ടർപട്ടികയിൽനിന്ന് ജില്ലയിലെ രണ്ടര ലക്ഷം വോട്ടർമാർ പുറത്തായി. എന്യൂമറേഷൻ ഫോം തിരികെ നൽകുന്നതിൽ പരാജയപ്പെട്ട 2,47,731 പേരെയാണ് പട്ടികയിൽനിന്ന് ഒഴിവാക്കിയത്. ഒക്ടോബർ 27ന് വോട്ടർപട്ടിക മരവിപ്പിച്ചപ്പോൾ ജില്ലയിൽ ആകെ 26,50,163 വോട്ടർമാരാണുണ്ടായിരുന്നത്. ഇപ്പോൾ പ്രസിദ്ധീകരിച്ച കരട് പട്ടികയിൽ ഇത് 24,02,432 ആയി കുറഞ്ഞു. എന്യൂമറേഷൻ ഘട്ടത്തിൽ ബൂത്ത് ലെവൽ ഓഫിസർമാർ വീടുകളിലെത്തി ഫോം നൽകിയിരുന്നെങ്കിലും വിവിധ കാരണങ്ങളാൽ ഇവ തിരികെ ലഭിച്ചില്ല.

വോട്ടർമാരുടെ എണ്ണത്തിൽ ഉണ്ടായ വർധനവ് കണക്കിലെടുത്ത് ജില്ലയിൽ 501 പുതിയ പോളിങ് സ്റ്റേഷനുകൾ കൂടി രൂപവത്കരിച്ചു. ഒരു ബൂത്തിൽ പരമാവധി വോട്ടർമാരുടെ എണ്ണം 1,200 ആയി നിജപ്പെടുത്തിയതോടെയാണ് മാറ്റം. ഇതോടെ ജില്ലയിലെ ആകെ പോളിങ് സ്റ്റേഷനുകളുടെ എണ്ണം 2,839 ആയി. നാട്ടിക മണ്ഡലത്തിലാണ് ഏറ്റവും കൂടുതൽ പോളിങ് സ്റ്റേഷനുകൾ (235) ഉള്ളത്. കുറവ് കൊടുങ്ങല്ലൂരിലാണ് (191). ഇതിനുപുറമെ 51 പോളിങ് സ്റ്റേഷനുകളുടെ ലൊക്കേഷനുകളിലും മാറ്റം വരുത്തിയിട്ടുണ്ട്.

കരട് പട്ടിക സംബന്ധിച്ച ആക്ഷേപങ്ങളും പുതിയ പേര് ചേർക്കാനുള്ള അപേക്ഷകളും ഡിസംബർ 23 മുതൽ ജനുവരി 22 വരെ സമർപ്പിക്കാം. ഓൺലൈനായും ബി.എൽ.ഒമാർ വഴിയും അപേക്ഷ നൽകാൻ സൗകര്യമുണ്ട്. പരാതികൾ തീർപ്പാക്കിയ ശേഷം ഫെബ്രുവരി 21ന് അന്തിമ വോട്ടർപട്ടിക പ്രസിദ്ധീകരിക്കും.കലക്ടറുടെ അധ്യക്ഷതയിൽ നടന്ന രാഷ്ട്രീയ പാർട്ടി പ്രതിനിധികളുടെ യോഗത്തിൽ സബ് കലക്ടർ അഖിൽ വി. മേനോൻ, ഡെപ്യൂട്ടി കലക്ടർ കെ. കൃഷ്ണകുമാർ തുടങ്ങിയവർ പങ്കെടുത്തു.