സലാഹുദ്ദീ​െൻറ മോഹം പുലർന്നു; റസലിന് ജീവിതമാർഗവും

വടക്കേക്കാട്: സകാത്​ വിഹിതം ഒരു കുടുംബത്തിന് ജീവനോപാധിയാകണമെന്ന സലാഹുദ്ദീ​െൻറ മോഹം സഫലമാക്കാൻ റസലി​െൻറ 'കാർ വാഷ് അറ്റ് ഹോം' സ്വയംതൊഴിൽ പദ്ധതി തുടങ്ങി. ഖത്തർ സർക്കാർ ഉടമസ്ഥതയിലുള്ള ഗ്യാസ് കമ്പനിയിലെ ഉന്നത ഉദ്യോഗസ്ഥനായ വട്ടംപാടം കൂളിക്കാട്ടിൽ സലാഹുദ്ദീൻ ഇത്തവണത്തെ ത​െൻറ സകാത് കല്ലൂർ മഹല്ലിലെ ഒരു കുടുംബത്തിന് രക്ഷയാകണമെന്ന ആഗ്രഹം കമ്മിറ്റി ഭാരവാഹികളെ അറിയിക്കുകയായിരുന്നു.

ഇതനുസരിച്ചാണ് കല്ലൂർ പള്ളിക്കു സമീപം വാടക വീട്ടിൽ താമസിക്കുന്ന പയക്കാട്ട് റസാഖി​െൻറയും റസിയയുടെയും മകൻ മുഹമ്മദ് റസലിന് (20) തൊഴിൽ ഉപകരണങ്ങൾ നൽകാൻ തീരുമാനിച്ചത്.

വീടുകളിൽ ചെന്ന് കാർ കഴുകി വൃത്തിയാക്കാൻ ഗ്ലോബൽ പവർ കമ്പനിയുടെ കാർ വാഷിങ്​ മെഷീനും വാക്വം ക്ലീനറും അനുബന്ധ ഉപകരണങ്ങളും ഇവ കൊണ്ടുനടക്കാൻ സെക്കൻഡ് ഹാൻഡ് കാറും ഉൾപ്പെടെ കഴിഞ്ഞ ദിവസം മഹല്ല് ഭാരവാഹികളുടെ സാന്നിധ്യത്തിൽ ഇമാം ഖലീലു റഹ്​മാൻ വാഫി കൈമാറി.

ലോക്ഡൗണിൽ പണിയില്ലാതായ നിർമാണത്തൊഴിലാളിയായ റസാഖ്​ ഇനി റസലി​െൻറ സഹായിയാകും. ഭാര്യയും രണ്ടു മക്കളും മാതാവും അടങ്ങുന്നതാണ് റസാഖി​െൻറ കുടുംബം. കാർ മാത്രമല്ല മതിലും നിലവും വൃത്തിയാക്കാൻ ഉപകരണംകൊണ്ട്​ കഴിയും. 250 മുതൽ 500 രൂപ വരെയാണ് ഈടാക്കുന്നത്. ഫോൺ: 8113870788.