ഗ്രൂപ് ആൾക്കൂട്ടമില്ലാതെ ചെന്നിത്തല തൃശൂരിൽ; ഡി.സി.സി ഓഫിസിലും എത്തിയില്ല

തൃശൂർ: ഗ്രൂപ് നേതാക്കളുടെയും പ്രവർത്തകരുടെയും തിരക്കില്ലാതെ മുൻ പ്രതിപക്ഷ നേതാവ് രമേശ് ചെന്നിത്തല തൃശൂരിൽ. ഗുരുവായൂരിൽ വ്യവസായി രവി പിള്ളയുടെ മക​െൻറ വിവാഹത്തിലും ഐ ഗ്രൂപ്പിൽ രമേശ് ചെന്നിത്തലയോട് അടുപ്പമുള്ളവർ പ്രസിഡൻറായ രണ്ട് സഹകരണ സംഘങ്ങളുടെ ചടങ്ങുകളിലുമാണ്​ പ​ങ്കെടുത്തത്​. സാധാരണ ചെന്നിത്തല എത്തുന്നതറിഞ്ഞാൽ ഏറെ നേരം മുമ്പുതന്നെ തിരക്കുകൂട്ടി നിൽക്കാറുള്ള നേതാക്കളും പ്രവർത്തകരും രംഗ​ത്തുണ്ടായില്ല.

കെ.പി.സി.സി സെക്രട്ടറി എ. പ്രസാദ്, ഡി.സി.സി ജനറൽ സെക്രട്ടറിയും ഐ.എൻ.ടി.യു.സി ജില്ല പ്രസിഡൻറുമായ സുന്ദരൻ കുന്നത്തുള്ളിയുമായിരുന്നു കൂടെ സജീവമായുണ്ടായിരുന്നത്. കെ.പി.സി.സി സെക്രട്ടറിമാരായ ഷാജി കോടങ്കണ്ടത്തും ടി.യു. രാധാകൃഷ്ണനും സന്ദർശിച്ച് മടങ്ങി. ജില്ല സഹകരണ ആശുപത്രി പ്രസിഡൻറ്​ ടി.കെ. പൊറിഞ്ചുവും ചില യൂത്ത് കോൺഗ്രസ് പ്രവർത്തകരും കാണാനെത്തി.

സാധാരണ ഗ്രൂപ് നേതാക്കളും പ്രവർത്തകരുമൊക്കെയായി വൻ ആൾക്കൂട്ടങ്ങളാണ് ഉമ്മൻ ചാണ്ടി, രമേശ് ചെന്നിത്തല എന്നിവരെത്തുമ്പോൾ ഉണ്ടാകാറുള്ളത്. പുതിയ ഡി.സി.സി പ്രസിഡൻറ്​ ജോസ് വള്ളൂർ സമീപകാലം വരെ രമേശ് ചെന്നിത്തലയോടൊപ്പമായിരുന്നെങ്കിലും കെ. സുധാകര​െൻറ നോമിനിയായാണ് പദവിയിലെത്തിയത്. കൂടെയുണ്ടായിരുന്ന മുൻ ഡി.സി.സി പ്രസിഡൻറ്​ എം.പി. വിൻസെൻറ് അടക്കമുള്ളവർ കെ.സി. വേണുഗോപാൽ പക്ഷത്തേക്കും മാറി. ഡി.സി.സി പ്രസിഡൻറുമാരുടെ നിയമനത്തെ ചൊല്ലിയുള്ള തർക്കത്തിന് ശേഷം ആദ്യമായാണ് ചെന്നിത്തല തൃശൂരിലെത്തുന്നത്. ഡി.സി.സി ഓഫിസിലേക്ക്​ അദ്ദേഹം വന്നില്ല. ഡി.സി.സി നേതാക്കൾ ഓഫിസിലുണ്ടായിരുന്നെങ്കിലും ചെന്നിത്തലയെ സന്ദർശിക്കാൻ രാമനിലയത്തിലേക്കും പോയില്ല.