ചാലിശ്ശേരി പഞ്ചായത്ത്​: 20 ദിവസത്തെ ഭരണത്തിന് പുതിയ പ്രസിഡൻറ്

പെരുമ്പിലാവ്: ഭരണകാലാവധി തീരാൻ ദിവസങ്ങൾ മാത്രം ബാക്കിനിൽക്കെ അഞ്ചു വർഷത്തിനിടയിലെ ചാലിശ്ശേരി പഞ്ചായത്തിലെ മൂന്നാമത്തെ പ്രസിഡൻറാണ്​ മൂന്നാം വാർഡ്​ അംഗം കോൺഗ്രസിലെ റംല വീരാൻകുട്ടി. പ്രസിഡൻറ്​ തെരഞ്ഞെടുപ്പിൽ സി. പി.എമ്മിലെ വേണു കുറുപ്പത്ത് ആയിരുന്നു എതിർസ്ഥാനാർഥി. ഏഴിനെതിരെ എട്ട് വോട്ടുകൾ നേടിയാണ് വിജയിച്ചത്. 20 ദിവസത്തെ കാലാവധിക്കാണ് പുതിയ പ്രസിഡൻറ്.

15 അംഗങ്ങളുള്ള ഭരണസമിതിയിൽ സി.പി.എമ്മിനും കോൺഗ്രസിനും ഏഴ് വീതവും മുസ്​ലിം ലീഗിന് ഒരംഗവുമാണുള്ളത്. യു.ഡി.എഫിലെ എട്ട് അംഗങ്ങളുടെ പിന്തുണയിൽ ആദ്യ മൂന്നര വർഷം കോൺഗ്രസിലെ ടി.കെ. സുനിൽകുമാറായിരുന്നു പ്രസിഡൻറ്. തെരഞ്ഞെടുപ്പ് സമയത്ത് യു.ഡി.എഫ് ധാരണപ്രകാരം അവസാന ഒന്നര വർഷം ലീഗ് സ്ഥാനാർഥിയെ പ്രസിഡൻറാക്കണമെന്ന തീരുമാനം ലംഘിച്ചതോടെ മുസ്​ലിം ലീഗ്, യു.ഡി.എഫ് ഭരണസമിതിക്ക് നൽകിയ പിന്തുണ പിൻവലിച്ച് കോൺഗ്രസ് പ്രസിഡൻറിനെതിരെ അവിശ്വാസം കൊണ്ടുവന്നു.

ഇതിനിടയിൽ കോൺഗ്രസ് അംഗം പ്രസിഡൻറ് സ്ഥാനം രാജിവെച്ചു. തുടർന്ന് ഇടതുപക്ഷത്തി‍െൻറ പിന്തുണയോടെ ലീഗ് അംഗം അക്ബർ ഫൈസൽ മാസ്​റ്റർ പ്രസിഡൻറായി. തദ്ദേശ തെരഞ്ഞെടുപ്പ് അടുത്തതോടെ പഞ്ചായത്ത് പ്രദേശത്തെ യു.ഡി.എഫിനുള്ളിലെ പടലപ്പിണക്കങ്ങൾ തീർത്തതോടെ ലീഗ് വീണ്ടും യു. ഡി.എഫിനൊപ്പമായി. കഴിഞ്ഞ മാസം ലീഗ് ആവശ്യപ്പെട്ടതനുസരിച്ച് അക്ബർ ഫൈസൽ പ്രസിഡൻറ് സ്ഥാനം രാജിവെച്ചു. ഒരുമാസമായി വൈസ് പ്രസിഡൻറായ സി.പി.എമ്മിലെ ആനി വിനു ആക്​ടിങ് പ്രസിഡൻറായി ചുമതല വഹിക്കുന്നതിനിടയിലാണ് വീണ്ടും തെരഞ്ഞെടുപ്പ് നടന്നത്.

യു.ഡി.എഫ് സ്ഥാനാർഥി റംലയുടെ പേര് ടി.കെ. സുനിൽ കുമാർ നിർദേശിക്കുകയും എം.പി. കോയക്കുട്ടി പിന്താങ്ങുകയും ചെയ്​തു. പഞ്ചായത്ത് ഹാളിൽ നടന്ന തെരഞ്ഞെടുപ്പിൽ ആനക്കര കൃഷി ഓഫിസർ എം.കെ. സുരേന്ദ്രൻ വരണാധികാരിയായി.