കയ്പമംഗലത്ത് എം.ഡി.എം.എയുമായി രണ്ടുപേർ പിടിയിൽ

കയ്പമംഗലം: മയക്കുമരുന്ന് എം.ഡി.എം.എയുമായി രണ്ടുപേരെ തൃശൂര്‍ എക്‌സൈസ് സ്പെഷൽ സ്‌ക്വാഡ് പിടികൂടി. ചെന്ത്രാപ്പിന്നി സ്വദേശി ജിനേഷ് (31), കയ്പമംഗലം സ്വദേശി വിഷ്ണു (25) എന്നിവരെ വെള്ളിയാഴ്ച രാത്രി നടത്തിയ വാഹന പരിശോധനയിലാണ് പിടികൂടിയത്.

ഇവരില്‍നിന്ന് മയക്കുമരുന്ന് കടമായി വാങ്ങിയ വിദ്യാർഥികളുടെ പേരുവിവരങ്ങളടങ്ങിയ അമ്പതോളം ലിസ്റ്റുകളും കണ്ടെടുത്തു. 15.2 ഗ്രാം എം.ഡി.എം.എ ആണ് കണ്ടെടുത്തത്. വിതരണത്തിന് ഉപയോഗിച്ചിരുന്ന വണ്ടിയും പിടിച്ചെടുത്തിട്ടുണ്ട്.

ഇവർ മയക്കുമരുന്ന് നൽകിയ വിദ്യാർഥികളെയും മറ്റും കണ്ടെത്തി രക്ഷിതാക്കളെ വിളിച്ച് ബോധവത്കരണവും മറ്റും നടത്താനാണ് എക്സൈസ് തീരുമാനം. പ്രതികളുടെ സാമ്പത്തിക സ്രോതസ്സിനെക്കുറിച്ചും ഇവര്‍ക്ക് എം.ഡി.എം.എ വിതരണം ചെയ്യുന്ന ആളുകളെപ്പറ്റിയും അന്വേഷിച്ചുവരുകയാണ്.