യു.എ.ഇയിലെ കോവിഡ് വാക്‌സിന്‍ പരീക്ഷണത്തിൽ ദേശമംഗലം സ്വദേശിയും

ചെറുതുരുത്തി: കോവിഡ് മഹാമാരിയെ നേരിടാൻ യു.എ.ഇയിൽ നടക്കുന്ന പ്രതിരോധമരുന്ന്​ പരീക്ഷണത്തിന് സ്വന്തം ശരീരം സമര്‍പ്പിച്ച് ദേശമംഗലം സ്വദേശി. പരേതനായ കാഞ്ഞിക്കുണ്ടില്‍ സൈതാലിയുടെ മകന്‍ സിറാജുദ്ദീനാണ്​ (31) കഴിഞ്ഞദിവസം ഏറെനേരം നീണ്ട പരീക്ഷണ വാക്‌സിനേഷന്‍ പൂര്‍ത്തിയാക്കിയത്​.

ദുബൈ ദേരയില്‍ അല്‍ ഹബ്​തൂർ മോട്ടോഴ്‌സിലാണ് ജോലി. ആറ്​ വര്‍ഷമായി ദുബൈയിലുണ്ട്​. പരീക്ഷണ കുത്തിവെപ്പില്‍ സന്നദ്ധസേവകരായി പങ്കെടുക്കാന്‍ യു.എ.ഇ സർക്കാർ ക്ഷണിച്ചിരുന്നു.

പത്രങ്ങളിലും സമൂഹമാധ്യമങ്ങളിലും ഇതുകണ്ട സിറാജ്​ ലോകചരി​ത്രത്തി​െൻറ ഭാഗമാകുന്ന പ്രവര്‍ത്തനത്തില്‍ പങ്കാളിയാവാൻ ആഗ്രഹിച്ചതായി​ 'മാധ്യമ'ത്തോട്​ പറഞ്ഞു.

യു.എ.ഇയിലെ സൈനികമേധാവിയാണ് ആദ്യപരീക്ഷണ കുത്തിവെപ്പിന്​ വിധേയനായത്. ജനങ്ങളില്‍ വിശ്വാസവും ധൈര്യവും ഉണ്ടാക്കാനായിരുന്നു അത്. ഒന്നും സംഭവിക്കില്ലെന്ന് ഉറപ്പുണ്ടായിരുന്നു.

അങ്ങനെയാണ് ഓൺലൈനിൽ രജിസ്​റ്റർ ചെയ്​തത്​. അബൂദബിയില്‍ അവസരം കിട്ടാതെ ഷാർജയിൽ പോയാണ്​ ടെസ്​റ്റ്​ നടത്തിയത്. കമ്പനിയിലെ സഹപ്രവർത്തകരായ റമീം, ഹാരിഷ് എന്നിവരെയും പ്രചോദനം നൽകി​ കൊണ്ടുപോയതായും​ സി.പി.എം പ്രവര്‍ത്തകനായ സിറാജ്​ പറഞ്ഞു.