മദ്യപാനം ചോദ്യംചെയ്തയാൾ മർദനമേറ്റ് മരിച്ച കേസിൽ യുവാവ് അറസ്​റ്റിൽ

ചാവക്കാട്: കടയുടെ മുന്നിലിരുന്ന് മദ്യപിക്കുന്നത് ചോദ്യം ചെയ്തയാൾ മർദനമേറ്റ് മരിച്ച കേസിൽ യുവാവ് അറസ്​റ്റിൽ.

അകലാട് ബദര്‍പള്ളി സൈക്കിൾ ഷോപ്പ് ഉടമ കുന്നമ്പത്ത് കോഞ്ചാടത്ത് മുഹമ്മദാലി (65) മരിച്ച കേസിൽ അകലാട് കുന്നമ്പത്ത് കുരിക്കളകത്ത് ഷഫീഖിനെയാണ് (30) വടക്കേകാട് പൊലീസ് അറസ്​റ്റ്​ ചെയ്തത്.

ഞായറാഴ്ച രാത്രി എട്ടോടെയാണ്​ സംഭവം. ദേശീയപാതയോരത്ത് മുഹമ്മദലിയുടെ വീടിനോട് ചേർന്ന സൈക്കിൾക്കടയുടെ മുന്നില്‍ ഷഫീഖും തമിഴ്നാട് സ്വദേശിയായ മുരുകനും മദ്യപിക്കുന്നതിനെ മുഹമ്മദാലി ചോദ്യം ചെയ്തു.

തുടര്‍ന്നുള്ള വാക്കുതര്‍ക്കമാണ് മർദനത്തിൽ കലാശിച്ചത്. പ്രതി ഷഫീഖിനെ കോടതി റിമാൻഡ് ചെയ്തു. കൂടെയുണ്ടായിരുന്ന മുരുകൻ ഒളിവിലാണ്.