അടിപ്പാത നിർമാണ സ്ഥലത്ത് വീണ്ടും അപകടം; ലോറികൾക്കിടയിൽ കാർ ഞെരിഞ്ഞമർന്നു

ചാലക്കുടി: ദേശീയ പാതയിൽ അടിപ്പാത നിർമാണം നടക്കുന്ന നഗരസഭ ജങ്ഷനിൽ വീണ്ടും അപകടം. രണ്ട് ലോറികൾക്കിടയിൽ കാർ ഞെരിഞ്ഞമർന്നു. യാത്രക്കാർ ചെറിയ പരിക്കുകളോടെ അത്ഭുതകരമായി രക്ഷപ്പെട്ടു.

ശനിയാഴ്ച രാവിലെ 11.30ഓടെയാണ് അപകടം. മാരുതി കാർ ടോറസ് ലോറിക്കും മറ്റൊരു വലിയ ലോറിക്കുമിടയിൽ പെടുകയായിരുന്നു. സ്ഥലത്തെത്തിയ പൊലീസും നാട്ടുകാരും അഗ്നിരക്ഷാ സേനയും ചേർന്ന് രക്ഷാപ്രവർത്തനം നടത്തി.

അപകടത്തെ തുടർന്ന് ഗതാഗതം സ്തംഭിച്ചു. അഗ്നി രക്ഷാസേന ചില്ലുകളും ഓയിലും പൊട്ടി റോഡിൽ വീണത് ശുദ്ധീകരിച്ചു. അടിപ്പാത നിർമാണം മുടങ്ങി കിടക്കുന്ന നഗരസഭ ജങ്ഷൻ അശാസ്ത്രീയ ഗതാഗതം മൂലം കാലങ്ങളായി അപകട കേന്ദ്രമായി തുടരുകയാണ്.