കോവിഡ്: മൃതദേഹം പള്ളിയില്‍ ഇറക്കി ചടങ്ങുകള്‍ നടത്തി; കേസെടുത്തു

തൃശൂര്‍: കോവിഡ് ബാധിച്ച് മരിച്ച സ്ത്രീയുടെ മൃതദേഹം പള്ളിയിലിറക്കി മതചടങ്ങുകള്‍ നടത്തിയ സംഭവത്തില്‍ കേസെടുത്തു. തൃശൂര്‍ ശക്തന്‍ നഗറിലെ എം.ഐ.സി പള്ളി അധികൃതര്‍ക്കെതിരെയും മരിച്ച വ്യക്തിയുടെ ബന്ധുക്കള്‍ക്കെതിരെയുമാണ് കേസ്.

കോവിഡ് ബാധിച്ച് മരിച്ച വരവൂര്‍ സ്വദേശിനി ഖദീജയുടെ (53) മൃതദേഹമാണ് പള്ളിയിലിറക്കി കുളിപ്പിക്കുകയും മത ചടങ്ങുകള്‍ നടത്തുകയും ചെയ്തത്. വിവരമറിഞ്ഞെത്തിയ ആരോഗ്യവകുപ്പ് അധികൃതരുടെ നിര്‍ദ്ദേശ പ്രകാരമാണ് പള്ളി അധികൃതര്‍ക്കും ബന്ധുക്കള്‍ക്കുമെതിരെ കേസെടുത്തത്.

സ്വകാര്യ ചാരിറ്റബിള്‍ ട്രസ്റ്റിന്റെ ഉടമസ്ഥതയിലുള്ള ആംബുലന്‍സിലാണ് മൃതദേഹമെത്തിച്ചത്. ആംബുലന്‍സ് കസ്റ്റഡിയിലെടുക്കുകയും ചെയ്തിട്ടുണ്ട്.