വീട്ടിൽ സൂക്ഷിച്ച 2450 ലിറ്റർ സ്​പിരിറ്റ്​ പിടികൂടി

ആമ്പല്ലൂർ: ആമ്പല്ലൂരിൽ​ വൻ സ്​പിരിറ്റ്​ വേട്ട. വീട്ടിൽ 70 കന്നാസുകളിലായി സൂക്ഷിച്ച 2450 ലിറ്റർ സ്​പിരിറ്റ്​ എക്​സൈസ്​ കമീഷണറുടെ സ്​റ്റേറ്റ്​ എക്​സൈസ്​ എൻഫോഴ്‌സ്‌മെൻറ്​ സ്​ക്വാഡ്​ പിടികൂടി​. വീട്ടിലെ താമസക്കാരൻ രഞ്​ജിത്ത്​, കൂട്ടാളികളായ ദയാനന്ദൻ, ജയിംസ്​ എന്നിവരെ അറസ്​റ്റ്​ ചെയ്​തു. സംഘത്തിൽ കൂടുതൽ പേരുണ്ടെന്നാണ്​ പ്രാഥമിക വിവരമെന്ന്​ എക്​സൈസ്​ വൃത്തങ്ങൾ അറിയിച്ചു.

പ്രതി രഞ്ജിത് മാസങ്ങള്‍ക്ക് മുമ്പാണ് ഈ വീട് വാങ്ങിയത്. പല സമയങ്ങളിലായാണ് പ്രതികള്‍ വീട്ടില്‍ സ്പിരിറ്റ് എത്തിച്ചത്. സമീപവാസികള്‍ക്ക് സംശയം തോന്നാത്ത രീതിയില്‍ യാത്രാവാഹനങ്ങളിലും സ്പിരിറ്റ് എത്തിച്ചിരുന്നു. വ്യാജമദ്യ നിർമാണത്തിനാണ്​ സ്പിരിറ്റ്​ കൊണ്ടുവന്നതെന്നാണ്​ അന്വേഷണ സംഘം പറയുന്നത്.

എൻഫോഴ്‌സ്‌മെൻറ്​ സ്‌ക്വാഡിന്​ ലഭിച്ച രഹസ്യ വിവരത്തെ തുടർന്നായിരുന്നു റെയ്​ഡ്​. ടീം ലീഡർ സർക്കിൾ ഇൻസ്‌പെക്​ടർ ടി. അനികുമാറും സംഘവുമാണ്​ പരിശോധന നടത്തിയത്​. സർക്കിൾ ഇൻസ്‌പെക്​ടർ ജി. കൃഷ്​ണകുമാർ, എക്‌സൈസ് ഇൻസ്‌പെക്​ടർമാരായ കെ.വി. വിനോദ്, ടി.ആർ. മുകേഷ് കുമാർ, അസി. എക്‌സൈസ് ഇൻസ്പെക്​ടർ മധുസൂദനൻ നായർ, സിവിൽ എക്‌സൈസ് ഓഫിസർമാരായ ജസീം, വിശാഖ്, സുബിൻ, ഷംനാദ്, രാജേഷ് എന്നിവരും ഉണ്ടായിരുന്നു.

ആറായിരം ലിറ്ററോളം സ്പിരിറ്റാണ് കഴിഞ്ഞ എട്ട് മാസത്തിനിടെ ആമ്പല്ലൂര്‍ മേഖലയില്‍നിന്ന് പിടികൂടിയത്​. വരന്തരപ്പിള്ളി വേപ്പൂരില്‍ സവാള കയറ്റിയ ലോറിയില്‍ കൊണ്ടുവന്ന് വീട്ടില്‍ സൂക്ഷിച്ച 3325 ലിറ്റര്‍ സ്പിരിറ്റ് ജനുവരിയില്‍ പിടികൂടിയിരുന്നു. വരന്തരപ്പിള്ളിയില്‍ സ്പിരിറ്റ് പിടികൂടിയ സംഭവവുമായി നെന്മണിക്കരയിലെ പ്രതികള്‍ക്ക് ബന്ധമുണ്ടോയെന്ന് അന്വേഷിക്കുമെന്ന് എക്‌സൈസ് ഉദ്യോഗസ്ഥര്‍ പറഞ്ഞു.