ചാലക്കുടിയിൽ 'സുവർണഗൃഹം' നിർമാണോദ്ഘാടനം 28ന്

ചാലക്കുടി: നഗരസഭയുടെ സുവർണ ജൂബിലി സ്മരണക്കായി നടപ്പാക്കുന്ന 'സുവർണഗൃഹം' പദ്ധതിയിൽ നൽകുന്ന 50 വീടുകളുടെ ആദ്യഘട്ട നിർമാണോദ്ഘാടനം 28ന്​ വൈകീട്ട് നാലിന്​ നടത്തും. കെ.എസ്.പി.പി.എൽ കമ്പനിയുടെ സി.എസ്​.ആർ ഫണ്ടിൽനിന്ന്​ അനുവദിച്ച 60 ലക്ഷം രൂപ ഉപയോഗിച്ചാണ്​ നിർമാണം. ബെന്നി ബഹനാൻ എം.പി നിർമാണോദ്ഘാടനം നിർവഹിക്കും. സനീഷ് കുമാർ ജോസഫ് എം.എൽ.എ മുഖ്യാതിഥിയാവും. പോട്ടയിൽ എട്ടാം വാർഡിൽ പുല്ലൻ ഫ്രാൻസിസ് ടോണി നഗരസഭക്ക് സൗജന്യമായി നൽകിയ സ്ഥലത്താണ് ആദ്യഘട്ട നിർമാണമെന്ന് ചെയർമാൻ വി.ഒ. പൈലപ്പൻ പറഞ്ഞു.