തുല്യരാണ് നമ്മൾ: 1500 ക്ലാസുകൾ പൂർത്തീകരിച്ചു

തൃശൂർ: 'ആർത്തവകാല ആരോഗ്യം സാമൂഹിക ഉത്തരവാദിത്തം' എന്ന സന്ദേശവാക്യവുമായി ജില്ലയിൽ നടപ്പാക്കുന്ന 'തുല്യരാണ് നമ്മൾ' ബഹുജന കാമ്പയിനിൽ 1500 ക്ലാസുകൾ പൂർത്തീകരിച്ചതിന്‍റെ പ്രഖ്യാപനം ജില്ല പഞ്ചായത്ത് പ്രസിഡന്‍റ് പി.കെ. ഡേവിസ് നിർവഹിച്ചു. കേരള ശാസ്ത്രസാഹിത്യ പരിഷത്തിന്‍റെയും ജില്ല പഞ്ചായത്തിന്‍റെയും ആഭിമുഖ്യത്തിൽ, വിവിധ സർക്കാർ വകുപ്പുകളുടെയും സംഘടനകളുടെയും സഹകരണത്തോടെയാണ് കാമ്പയിൻ ജില്ലയിൽ മുന്നേറുന്നത്. തൃശൂർ ആസൂത്രണ ഭവൻ ഹാളിൽ നടന്ന യോഗത്തിൽ ജില്ലപഞ്ചായത്ത് വൈസ് പ്രസിഡന്‍റ് ഷീന പറയങ്ങാട്ടിൽ അധ്യക്ഷത വഹിച്ചു. ജില്ല കലക്ടർ ഹരിത വി. കുമാർ മുഖ്യാതിഥിയായി. സംഘാടക സമിതി ജനറൽ കൺവീനർ പി.എസ്. ജൂന, ജില്ല പഞ്ചായത്ത് സ്റ്റാൻഡിങ്​ കമ്മിറ്റി ചെയർമാന്മാരായ എ.വി. വല്ലഭൻ, കെ.എസ്. ജയ, ലത ചന്ദ്രൻ എന്നിവരും ജില്ല പ്രോഗ്രാം മാനേജർ ഡോ. യു.ആർ. രാഹുൽ, വനിത -ശിശു വികസന വകുപ്പ് ജില്ല ഓഫിസർ പി. മീര, ശാസ്ത്രസാഹിത്യ പരിഷത്ത് ജില്ല പ്രസിഡന്‍റ്​ ഡോ. കെ. വിദ്യാസാഗർ, ജൻഡർ വിഷയസമിതി ജില്ല കൺവീനർ എ.എസ്. ജിനി എന്നിവരും സംസാരിച്ചു. അനുബന്ധമായി സംഘടിപ്പിച്ച സെമിനാറിൽ 'ഇന്നത്തെ ജൻഡർ സമത്വം, നാളത്തെ സുസ്ഥിരതക്കായ്' വിഷയം ഡോ. കെ.പി.എൻ. അമൃത അവതരിപ്പിച്ചു.