കരുവന്നൂർ സഹകരണ ബാങ്ക്​ ക്രമക്കേട്​: ഉദ്യോഗസ്ഥന്‍റെ സസ്‌പെൻഷനിൽ ഇടപെടാതെ ഹൈകോടതി

കൊച്ചി: തൃശൂരിലെ കരുവന്നൂർ സർവിസ് സഹകരണ ബാങ്ക്​ ക്രമക്കേടുമായി ബന്ധപ്പെട്ട്​ സസ്‌പെൻഡ് ചെയ്യപ്പെട്ട ഉദ്യോഗസ്ഥനെതിരായ നടപടിയിൽ ഇടപെടാതെ കേസ്​ പിന്നീട്​ പരിഗണിക്കാൻ ഹൈകോടതി മാറ്റി. ക്രമക്കേട്​ കണ്ടെത്തിയിട്ടും നടപടി സ്വീകരിച്ചില്ലെന്ന കാരണത്താൽ തന്നെ സസ്​പെൻഡ്​ ചെയ്ത നടപടി റദ്ദാക്കണമെന്നാവശ്യപ്പെട്ട്​ സഹകരണ വകുപ്പിലെ അസി. രജിസ്ട്രാർ കെ. ഒ. ഡേവിസ് നൽകിയ ഹരജിയാണ്​ ജസ്റ്റിസ്​ സി. എസ്.​ ഡയസ്​, ജസ്റ്റിസ്​ സി. ജയചന്ദ്രൻ എന്നിവരടങ്ങുന്ന ഡിവിഷൻബെഞ്ച്​ പരിഗണിച്ചത്​. ശനിയാഴ്ച വിരമിക്കാനിരിക്കെ സസ്​പെൻഷൻ പിൻവലിക്കണമെന്ന ആവശ്യമുന്നയിച്ചെങ്കിലും കോടതി ഇടപെട്ടില്ല. മേയ് ആറിന്​ ഹരജി വീണ്ടും പരിഗണിക്കാൻ മാറ്റി. തൃശൂർ ജില്ലയിലെ കരുവന്നൂർ സർവിസ് സഹകരണ ബാങ്കിൽ 2011 മുതൽ 2019 വരെയുള്ള കാലയളവിൽ 350 കോടി രൂപയുടെ ക്രമക്കേട്​ കണ്ടെത്തിയിരുന്നു. തുടർന്ന് ബാങ്ക് ഭരണസമിതിയംഗങ്ങൾ ഉൾപ്പെടെയുള്ള കുറ്റക്കാർക്കെതിരെ ക്രൈംബ്രാഞ്ച് കേസെടുക്കുകയായിരുന്നു. ഇതോടൊപ്പം സഹകരണ വകുപ്പ്​ സെക്രട്ടറിയുടെ നേതൃത്വത്തിൽ ഉന്നതതല സമിതി നടത്തിയ വകുപ്പുതല അന്വേഷണത്തിൽ ഹരജിക്കാരനടക്കം 16 സഹകരണ വകുപ്പ് ഉദ്യോഗസ്ഥരെ സസ്പെൻഡ് ചെയ്തു. എട്ടുമാസം മുമ്പാണ് നടപടിയെടുത്തത്.