ബസ്​ പണിമുടക്ക് പൂർണം

തൃശൂർ: തൃശൂർ-പാലക്കാട്​ ദേശീയപാതയിൽ പന്നിയങ്കരയിലെ അമിത ടോൾ പിരിവിനെതിരെ സ്വകാര്യ ബസുടമകളും തൊഴിലാളികളും നടത്തിയ സൂചന പണിമുടക്ക് പൂർണം. ജില്ലയിലെ ചില ഭാഗങ്ങളിൽ ഒറ്റപ്പെട്ട സർവിസുകളുണ്ടായെങ്കിലും 99 ശതമാനം സ്വകാര്യ ബസുകളും നിരത്തിലിറങ്ങിയില്ല. പാലക്കാട്- തൃശൂർ ജില്ലകളിലെ സ്വകാര്യ ബസുടമകളാണ് സൂചന സമരം നടത്തിയത്. കഴിഞ്ഞ 20 ദിവസമായി ടോൾ നിരക്ക് കുറക്കണമെന്നാവശ്യപ്പെട്ട് പാലക്കാട്-തൃശൂർ റൂട്ടിൽ സ്വകാര്യ ബസുടമകൾ പണിമുടക്കിലാണ്. ഇവർക്ക് പിന്തുണ പ്രഖ്യാപിച്ചാണ് രണ്ടു ജില്ലകളിലായി ബസുടമകളും തൊഴിലാളികളും സമരം നടത്തിയത്. അതേസമയം, ദീർഘദൂര ബസുകളിൽ അധികവും സർവിസ്​ നടത്തി. ഏക സർവിസ്​ ബസുകളും ഓടി. സമരത്തെ തുടർന്ന് ജനങ്ങൾക്ക് ടാക്‌സി, ഓട്ടോ സർവിസുകളെ ആശ്രയിക്കേണ്ടിവന്നു. പണിമുടക്കിന്‍റെ പശ്ചാത്തലത്തിൽ കഴിഞ്ഞ 12 മുതൽ കെ.എസ്​.ആർ.ടി.സി തൃശൂർ-പാലക്കാട്​-ചിറ്റൂർ മേഖലകൾ കേന്ദ്രീകരിച്ച്​ സർവിസ്​ തുടരുകയാണ്​. ഓരോ പത്ത്​ മിനിറ്റ്​ ഇടവിട്ടും പാലക്കാ​ട്ടേക്കും 20 മിനിറ്റ്​ ഇടവിട്ട്​ തൃശൂർ-ഗോവിന്ദാപുരത്തേക്കും സർവിസ്​ നടത്തുന്നുണ്ട്​. വ്യാഴാഴ്ചയും സമാനമായ സർവിസ്​ പാല​ക്കാട്​ ഭാഗത്തേക്ക്​ ഉണ്ടായിരുന്നു. ഇതുകൂടാതെ ജില്ലയിലെ ഏഴ്​ യൂനിറ്റുകളിൽനിന്നായി 150 ട്രിപ്പുകളും വ്യാഴാഴ്ച നടത്തി.