ചലച്ചിത്ര സ്ഥാപനങ്ങളെ എൻ.എഫ്​.ഡി.സിയിൽ ലയിപ്പിക്കാനുള്ള കേന്ദ്ര നീക്കത്തിനെതിരെ സിനിമ പ്രവർത്തകർ

തൃശൂർ: ചലച്ചിത്രരംഗത്ത്​ ഗുണപരമായ ഇടപെടലുകൾ നടത്തുന്ന സ്വതന്ത്ര സ്ഥാപനങ്ങളായ നാഷനൽ ഫിലിം ആർക്കൈവ്​സ്​ ഓഫ്​ ഇന്ത്യ ഫിലിംസ്​ ഡിവിഷൻ, ചിൽഡ്രൻസ്​ ഫിലിം സൊസൈറ്റി ഓഫ്​ ഇന്ത്യ, ഡയറക്ടറേറ്റ്​ ഓഫ്​ ഫിലിം ഫെസ്റ്റിവൽ എന്നിവയെ ഇല്ലാതാക്കി നാഷനൽ ഫിലിം ഡെവലപ്​മെന്‍റ്​ കോർപറേഷനിൽ (എൻ.എഫ്​.ഡി.സി) ലയിപ്പിക്കാനുള്ള കേന്ദ്ര സർക്കാർ നീക്കത്തിനെതിരെ പ്രമുഖ സിനിമപ്രവർത്തകർ രംഗത്ത്​. തൃശൂർ അന്താരാഷ്ട്ര ചലച്ചിത്രോത്സവ ഡയറക്ടർ പ്രേമേന്ദ്ര മജുംദാർ, പ്രമുഖ സംവിധായകൻ ഗിരീഷ്​ കാസറവള്ളി, ജൂറി ചെയർമാൻ ജി.പി. രാമചന്ദ്രൻ, സംവിധായക താര രാമാനുജൻ, സൗണ്ട്​ ഡിസൈനർ ടി. കൃഷ്ണനുണ്ണി, ഫെസ്റ്റിവൽ എക്സിക്യൂട്ടിവ് ഡയറക്ടർ ചെറിയാൻ ജോസഫ് എന്നിവരാണ്​ വാർത്തസമ്മേളനത്തിൽ കേന്ദ്ര സർക്കാർ നീക്കത്തിനെതിരെ രംഗത്തുവന്നത്​. സർക്കാറിന്‍റെ പണം മുടിക്കുന്ന ഉൽപാദനക്ഷമമല്ലാത്ത പ്രവർത്തനങ്ങളാണ്​ ഈ സ്ഥാപനങ്ങളിൽ നടക്കുന്നതെന്ന അധികൃതരുടെ വാദം ബാലിശമാണെന്ന്​ ഗിരീഷ്​ കാസറവള്ളി വ്യക്തമാക്കി. ഈ സ്ഥാപനങ്ങൾ വരുമാനം ഉണ്ടാക്കുന്നവയല്ലെന്നും രാജ്യത്തിന്‍റെ പൈതൃകവും സാംസ്കാരിക വൈവിധ്യവുമൊക്കെ സിനിമയിലൂടെ ജനങ്ങളിലേക്ക്​ എത്തിക്കുകയാണ്​ ഇവയുടെ ലക്ഷ്യവുമെന്ന്​ അദ്ദേഹം അഭിപ്രായപ്പെട്ടു. ഇന്ത്യയുടെ സംസ്കാരത്തെയും കലാപാരമ്പര്യങ്ങളെയും ചരിത്രത്തെയും കലയെയും കലാകാരന്മാരെയും സംരക്ഷിക്കുന്നതിൽ വലിയ സംഭാവനകൾ നൽകിയ സ്ഥാപനങ്ങൾ ഇല്ലാതാകണമെന്ന കേന്ദ്ര സർക്കാർ നയത്തിന്‍റെ ഭാഗമാണിതെന്ന്​ പ്രേമേന്ദ്ര മജുംദാർ വ്യക്തമാക്കി. വിനാശകരമായ ഈ നടപടിയില്‍നിന്ന് കേന്ദ്രം പിന്തിരിയണമെന്നും നാഷനല്‍ ഫിലിം ആര്‍ക്കൈവ്‌സ് ഓഫ് ഇന്ത്യ, ഫിലിംസ് ഡിവിഷന്‍, ചില്‍ഡ്രന്‍സ് ഫിലിം സൊസൈറ്റി ഓഫ് ഇന്ത്യ, ഡയറക്ടറേറ്റ് ഓഫ് ഫിലിം ഫെസ്റ്റിവല്‍സ് എന്നീ സ്ഥാപനങ്ങളെ സ്വതന്ത്രമായി പ്രവർത്തിക്കാൻ അനുവദിക്കമെന്നും 17ാമത് തൃശൂര്‍ അന്താരാഷ്ട്ര ചലച്ചിത്ര മേള ആവശ്യപ്പെട്ടു.