കഥകളി ക്ലബ്​ വാർഷികാഘോഷം ഒമ്പതിന്​ തുടങ്ങും

തൃശൂർ: കഥകളി ക്ലബിന്‍റെ 57ാം വാർഷികാഘോഷവും ഡോ. കെ.എൻ. പിഷാരടി സ്മാരക സുവർണ മുദ്ര സമർപ്പണവും ഒമ്പത്​, 10 തീയതികളിൽ സംഗീത നാടക അക്കാദമി കെ.ടി. മുഹമ്മദ് സ്മാരക തിയറ്ററിൽ നടക്കുമെന്ന് ഭാരവാഹികൾ അറിയിച്ചു. ഒമ്പതിന്​ വൈകീട്ട് അഞ്ചിന്​ കേളിയും പുറപ്പാടുമാണ്​. ആറിന്​ മുൻ മന്ത്രി വി.എസ്. സുനിൽകുമാർ ഉദ്ഘാടനം ചെയ്യും. സദനം നരിപ്പറ്റ നാരായണൻ നമ്പൂതിരിക്ക്​ സുരേഷ്​​ ഗോപി എം.പി ഒരു പവൻ സുവർണ മുദ്ര സമ്മാനിക്കും. കഥകളി ക്ലബ് രക്ഷാധികാരി ഡോ. കെ. ബാലകൃഷ്ണൻ അനുമോദന പ്രഭാഷണവും പി. ബാലചന്ദ്രൻ എം.എൽ.എ സ്മാരക പ്രഭാഷണവും നിർവഹിക്കും. തുടർന്ന്​ ഡോ. സദനം കൃഷ്ണൻകുട്ടി കീചകനായും കലാമണ്ഡലം രാജശേഖരൻ സൈരന്ധ്രിയായും വേഷമിടുന്ന 'കീചകവധം' കഥകളി അര​ങ്ങേറും. 10ന് വൈകീട്ട് അഞ്ചിന്​ ടി.എൻ. പ്രതാപൻ എം.പി സോവനീർ പ്രകാശനം ചെയ്യും. അഡ്വ.എ.യു. രഘുരാമപ്പണിക്കർ ഏറ്റുവാങ്ങും. 6.30ന് നളചരിതം ഒന്നാംദിവസം കഥകളിയിൽ ഡോ. കലാമണ്ഡലം ഗോപി നളനായി രംഗത്തെത്തും. വാർത്തസമ്മേളനത്തിൽ തൃശൂർ കഥകളി ക്ലബ്​ പ്രസിഡന്‍റ്​ എ.എൻ. കൃഷ്ണൻ, സെക്രട്ടറി അഡ്വ. ചാൾസ്​ കാൾ, വൈസ്​ പ്രസിഡന്‍റുമാരായ ഡോ. ശ്യാം വേണു​ഗോപാൽ, കെ.ആർ. നാരായണൻ ചാക്യാർ, ട്രഷറർ പ്രശാന്ത്​ മേനോൻ എന്നിവർ പ​ങ്കെടുത്തു.