മറ്റ്​ മതങ്ങളോടുള്ള മനോഭാവത്തിൽ ക്രൈസ്തവ സഭകൾ തിരുത്തൽ വരുത്തണം -കാതോലിക്ക ബാവ

കുന്നംകുളം: നിലപാടുകളിലും വിശ്വാസത്തിലും അടിയുറച്ച് നില്‍ക്കുമ്പോഴും മറ്റ്​ മതങ്ങളോടുള്ള മനോഭാവത്തില്‍ ആവശ്യമായ തിരുത്തലുകള്‍ ക്രൈസ്തവ സഭകൾ വരുത്തണമെന്ന് മലങ്കര ഓര്‍ത്തഡോക്‌സ് സഭ പരമാധ്യക്ഷന്‍ ബസേലിയോസ് മാര്‍തോമ മാത്യൂസ് തൃതീയന്‍ കാതോലിക്കബാവ. മലബാര്‍ സ്വതന്ത്ര സുറിയാനി സഭ 250-ാം വാര്‍ഷികാഘോഷം കുന്നംകുളത്ത് ഉദ്ഘാടനം ചെയ്യുകയായിരുന്നു അദ്ദേഹം. മാനുഷികമൂല്യങ്ങള്‍ക്ക് വിപരീതമായി സഞ്ചരിക്കുന്ന ഒരു വിഭാഗമുണ്ട്. അവരുടെ പ്രശ്‌നങ്ങള്‍ മനസ്സിലാക്കണം. സമൂഹത്തില്‍ അവരെ ഉയര്‍ത്തേണ്ട ഉത്തരവാദിത്തം മതങ്ങള്‍ക്കുണ്ട്. അത് നിറവേറ്റുന്നില്ലെങ്കില്‍ മതങ്ങളുടെ ദൗത്യം പരാജയപ്പെടുമെന്നും കാതോലിക്ക ബാവ പറഞ്ഞു. സഭ പരമാധ്യക്ഷന്‍ സിറില്‍ മാര്‍ ബസേലിയോസ് മെത്രാപ്പോലീത്ത അധ്യക്ഷത വഹിച്ചു. തൃശൂര്‍ ആര്‍ച്ച് ബിഷപ്പ് മാര്‍ ആന്‍ഡ്രൂസ് താഴത്ത്, ബിലീവേഴ്‌സ് ക്രിസ്ത്യന്‍ ചര്‍ച്ച് മെത്രാപ്പോലീത്ത മാത്യൂസ് മോര്‍ സില്‍വാനോസ് എപ്പിസ്‌കോപ്പ, എ.സി. മൊയ്തീന്‍ എം.എല്‍.എ, നഗരസഭ ചെയര്‍പേഴ്‌സൻ സീത രവീന്ദ്രന്‍, കൗണ്‍സിലര്‍ ലെബീബ് ഹസ്സന്‍, ബിനോയ് പി. മാത്യു, ഫാ. വര്‍ഗീസ് വാഴപ്പിള്ളി, ഫാ. പ്രിന്‍സ് ഐ. കോലാടി, ഗീവര്‍ മാണി എന്നിവര്‍ സംസാരിച്ചു. tcckkm 2 മലബാർ സ്വതന്ത്ര സുറിയാനി സഭ 250ാം വാർഷിക സമ്മേളനം കുന്നംകുളത്ത് മലങ്കര ഓര്‍ത്തഡോക്‌സ് സഭ പരമാധ്യക്ഷന്‍ ബസേലിയോസ് മാര്‍തോമ മാത്യൂസ് തൃതീയന്‍ കാതോലിക്ക ബാവ ഉദ്ഘാടനം ചെയ്യുന്നു