ബി.എസ്​.എൻ.എൽ​-എം.ടി.എൻ.എൽ ലയനത്തിന്​ കേന്ദ്രനീക്കം

* പ്രധാനമന്ത്രിക്ക്​ എംപ്ലോയീസ്​ യൂനിയന്‍റെ കത്ത്​ തൃശൂർ: വികസന മുരടിപ്പും സാമ്പത്തിക പ്രതിസന്ധിയും നേരിടുന്ന ബി.എസ്​.എൻ.എല്ലിന്​ കൂനിന്മേൽ കുരുവാകാൻ എം.ടി.എൻ.എല്ലുമായി ലയന നീക്കം. ദുർബലമായ ബി.എസ്​.എൻ.എല്ലിൽ ഊർദ്ധ്വൻ വലിക്കുന്ന എം.ടി.എൻ.എല്ലിനെ (മഹാനഗർ ടെലികോം നിഗാം ലിമിറ്റഡ്​) ലയിപ്പിക്കാനാണ്​ നീക്കം. ഇത്​ സംബന്ധിച്ച്​ ടെലികോം വകുപ്പ്​ കേന്ദ്ര കാബിനറ്റിന്​ കത്ത്​ നൽകി. നിർദേശം അംഗീകരിച്ചാൽ അത്​ ബി.എസ്​.എൻ.എല്ലിന്‍റെ പതനത്തിലേക്ക്​ വഴിവെക്കും. ബി.എസ്​.എൻ.എൽ സി.എം.ഡി പി.കെ. പുർവാർ തന്നെയാണ്​ മുംബൈ, ഡൽഹി നഗരങ്ങളിൽ പ്രവർത്തിക്കുന്ന പൊതുമേഖല ടെലികോം കമ്പനിയായ എം.ടി.എൻ.എല്ലിന്‍റെയും സി.എം.ഡി. എം.ടി.എൻ.എൽ നിലവിൽ 2,06,000 കോടി രൂപ കടത്തിലാണെന്നാണ്​ പുറത്തുവരുന്ന കണക്ക്​. അതേസമയം, വരുമാനം 1,300 കോടി മാത്രമാണ്​. പലിശ നൽകാൻ മാത്രം 2,100 കോടി രൂപ വേണം. അതിനുള്ള വരുമാനംപോലും കിട്ടുന്നില്ല. ഇത്തരമൊരു സ്ഥാപനത്തെയാണ്​ ബി.എസ്​.എൻ.എല്ലിൽ ലയിപ്പിക്കാൻ കേന്ദ്ര സർക്കാർ നീക്കം നടത്തുന്നത്​. 4ജി ഇല്ലാത്തതിന്‍റെ ദുരിതം പേറുന്ന ബി.എസ്​.എൻ.എൽ കടുത്ത പ്രതിസന്ധിയാണ്​ നേരിടുന്നത്​. സ്വകാര്യ മൊബൈൽ സേവന ദാതാക്കൾ 5ജിയിലേക്ക്​ നീങ്ങാൻ ഒരുങ്ങുമ്പോഴാണ്​ ബി.എസ്​.എൻ.എൽ 2ജി, 3ജി എന്നിവയിൽ കറങ്ങുന്നത്​. 4ജി വൈകാതെ വരുമെന്ന്​ പറയുന്നുണ്ടെങ്കിലും ഇതിന്‍റെ സാ​ങ്കേതിക പൂർത്തീകരണത്തിന്​ ഇനിയും സമയമെടുക്കും. ബി.എസ്​.എൻ.എല്ലിന്​ 4ജി യാഥാർഥ്യമാകുമ്പോഴേക്കും സ്വകാര്യ കമ്പനികൾ 5ജിയിൽ എത്തും. അതോടെ വീണ്ടും പിന്തള്ളപ്പെടുന്ന സ്ഥിതി വരും. അധിക ജീവനക്കാരാണ്​ ബാധ്യതക്ക്​ കാരണമെന്ന്​ പറഞ്ഞ്​ സ്വയം വിരമിക്കൽ പ്രഖ്യാപിച്ച ബി.എസ്​.എൻ.എല്ലിൽനിന്ന്​ ഏതാണ്ട്​ 80,000 ജീവനക്കാരാണ്​ ഒറ്റയടിക്ക്​ വിരമിച്ചത്​. അത്രയും ചെലവ്​ ഒരുമിച്ച്​ കുറവ്​ വന്നിട്ടും കമ്പനി രക്ഷപ്പെട്ടില്ല. 4ജി വികസിപ്പിക്കാൻ കേന്ദ്ര സർക്കാർ തന്നെ പ്രതിബന്ധം സൃഷ്ടിച്ചതാണ്​ യഥാർഥ പ്രശ്നമെന്ന്​ ബി.എസ്​.എൻ.എല്ലിലെ ജീവനക്കാരുടെ സംഘടനകൾ വെളി​പ്പെടുത്തിയതാണ്​. ഈ പ്രതിസന്ധി നിലനിൽക്കുമ്പോഴാണ്​ എം.ടി.എൻ.എല്ലിനെ ലയിപ്പിക്കാൻ നീക്കം സജീവമായത്​. ലയനം ബി.എസ്​.എൻ.എല്ലിന്​ അപരിഹാര്യമായ നാശം വരുത്തിവെക്കുമെന്നും ഉപേക്ഷിക്കണമെന്നും ആവശ്യ​പ്പെട്ട്​ ജീവനക്കാരുടെ പ്രബല സംഘടനയായ എംപ്ലോയീസ്​ യൂനിയൻ ജനറൽ സെക്രട്ടറി പി. അഭിമന്യു പ്രധാനമന്ത്രിക്ക്​ കത്തെഴുതി. എം.ടി.എൻ.എല്ലിന്‍റെ കടബാധ്യത സർക്കാർ ഏറ്റെടുക്കണമെന്നും ബി.എസ്​.എൻ.എല്ലിനും എം.ടി.എൻ.എല്ലിനും വിതരണ ശൃംഖല ശക്തിപ്പെടുത്താൻ ആവശ്യമായ സാമ്പത്തിക സഹായം അനുവദിക്കണമെന്നും കത്തിൽ ആവശ്യപ്പെട്ടു.