കെ​ റെയിൽ കേരളത്തിൽ സി.പി.എമ്മിന്‍റെ അന്ത്യം കുറിക്കും -കെ. സുധാകരൻ

കെ-റെയിൽ കേരളത്തിൽ സി.പി.എമ്മിന്‍റെ അന്ത്യം കുറിക്കും -കെ. സുധാകരൻ തൃശൂർ: കേരളത്തിലെ സാധാരണക്കാരെ പൊലീസിനെയും പാർട്ടിക്കാരെയും ഉപയോഗിച്ച് അടിച്ചൊതുക്കി കെ-റെയിൽ പദ്ധതി നടപ്പാക്കാമെന്നത്​ മുഖ്യമന്ത്രി പിണറായി വിജയന്‍റെ വ്യാമോഹം മാത്രമാണെന്നും ഈ അഴിമതി പദ്ധതിയെ കേരള ജനതക്കൊപ്പം നിന്ന്​ ചെറുത്തു തോൽപിക്കാൻ കോൺഗ്രസും യു.ഡി.എഫും പ്രതിജ്ഞാബദ്ധമാണെന്നും കെ.പി.സി.സി പ്രസിഡന്‍റ്​ കെ. സുധാകരൻ എം.പി പറഞ്ഞു. തൃശൂർ ഡി.സി.സി ഓഫിസിൽ തൃശൂർ, പാലക്കാട് ജില്ലകളിലെ മെംബർഷിപ് ചീഫ് എൻറോളർമാരുടെയും എൻറോളർമാരുടെയും പരിശീലന ക്യാമ്പ് ഉദ്ഘാടനം ചെയ്യുകയായിരുന്നു അദ്ദേഹം. ഈ മാസം 24 മുതൽ 31 വരെ സംസ്ഥാനത്ത് അംഗത്വ വാരമായി ആചരിക്കും. 50 ലക്ഷം അംഗങ്ങ​ളെ ചേർക്കും. 27ന്​ സംസ്ഥാനത്തെ മുഴുവൻ നേതാക്കളും സ്വന്തം ബൂത്തിൽ മെംബർമാരെ ചേർക്കാനിറങ്ങുമെന്നും അദ്ദേഹം പറഞ്ഞു. ഡി.സി.സി പ്രസിഡന്‍റ്​ ജോസ് വള്ളൂർ അധ്യക്ഷത വഹിച്ചു. കെ.പി.സി.സി വർക്കിങ്​ പ്രസിഡന്‍റ്​ ടി. സിദ്ദീഖ്, വൈസ് പ്രസിഡന്‍റ്​ വി.ടി. ബൽറാം, പാലക്കാട് ഡി.സി.സി പ്രസിഡൻറ് എ. തങ്കപ്പൻ, ജനറൽ സെക്രട്ടറിമാരായ കെ. ജയന്ത്, അബ്ദുൽ മുത്തലിബ്, സി. ചന്ദ്രൻ, മുൻ ഡി.സി.സി പ്രസിഡന്‍റുമാരായ ഒ. അബ്ദുറഹ്മാൻകുട്ടി, പി.എ. മാധവൻ, എം.പി. വിൻസന്‍റ്​, സി.വി. ബാലചന്ദ്രൻ, പത്മജ വേണുഗോപാൽ, ജോസഫ് ചാലിശ്ശേരി, മുൻ എം.എൽ.എമാരായ ടി.വി. ചന്ദ്രമോഹൻ, എം.കെ. പോൾസൺ, അനിൽ അക്കര, ദലിത് കോൺഗ്രസ് സംസ്ഥാന പ്രസിഡന്‍റ്​ സി.സി. ശ്രീകുമാർ, ഒ.ബി.സി കോൺഗ്രസ് സംസ്ഥാന ചെയർമാൻ സുമേഷ് അച്യുതൻ എന്നിവർ സംസാരിച്ചു. ------------- ഫോട്ടോ: ജോൺസൺ