പ്രളയ സാധ്യത കുറക്കാൻ ജില്ലയിൽ കർമ പദ്ധതി

പ്രളയ സാധ്യത കുറക്കാൻ ജില്ലയിൽ കർമപദ്ധതി പുഴക്കൽ, കേച്ചേരി, കരുവന്നൂർ, ചാലക്കുടി പുഴകളിൽനിന്ന്​ ചളിയും മാലിന്യങ്ങളും ഉടൻ നീക്കും തൃശൂർ: 2018, 2019 വർഷങ്ങളിലെ പ്രളയാവശിഷ്ടങ്ങൾ നീക്കം ചെയ്ത്​ പ്രളയ സാധ്യത കുറക്കാനുള്ള പ്രവർത്തനങ്ങൾക്ക്​ ജില്ല ഭരണകൂടം മാർഗരേഖയിറക്കി. ഇതിന്‍റെ ഭാഗമായി പുഴക്കൽ, കേച്ചേരി, കരുവന്നൂർ, ചാലക്കുടി തുടങ്ങിയ പുഴകളിൽനിന്ന്​ ചളിയും മാലിന്യങ്ങളും മറ്റ്​ അവശിഷ്ടങ്ങളും നീക്കാൻ കലക്ടർ പ്രത്യേക നിർ​ദേശം നൽകി. 2018 -19 പ്രളയകാലത്ത്​ ചാലക്കുടി, പുഴക്കൽ, കേച്ചേരി, കരുവന്നൂർ പുഴകളിൽ അടിഞ്ഞ സിൽട്ട്​, ക്ലേ തുടങ്ങിയ മാലിന്യം എത്ര നീക്കം ചെയ്യാനുണ്ടെന്ന്​ ജലസേചന വകുപ്പും തദ്ദേശ വകുപ്പും ചേർന്ന്​ ക​ണ്ടെത്തണം. ഒഴുക്കിന്​ തടസ്സമായി നിൽക്കുന്ന മരച്ചില്ലകൾ ഉൾപ്പെടെ മുറിച്ചുനീക്കണം. ഈ പ്രവൃത്തികൾക്ക്​ തെഴിലുറപ്പ്​ പദ്ധതി, വ്യാപാരി -വ്യവസായി സംഘടനകൾ, റെസിഡന്‍റ്​സ്​ അസോസിയേഷൻ, സന്നദ്ധ സംഘടനകൾ എന്നിവയെ ഉപയോഗപ്പെടുത്താം. നദികളുടെ അടിത്തട്ടിലേക്ക്​ ആഴം കൂട്ടാനുള്ള നടപടി ഏറ്റെടുക്കരുത്​. അടിഞ്ഞ മാലിന്യങ്ങൾ നീക്കാനും ലേലം ചെയ്യാനും നടപടിയെടുക്കണം. 30:70 അനുപാതത്തിൽ പൊതുലേലത്തിൽ വിറ്റുകിട്ടുന്ന തുകക്ക്​ യഥാക്രമം റിവർ മാനേജ്​മെന്‍റ്​ ഫണ്ട്​, തദ്ദേശ സ്ഥാപനം എന്നിവർക്ക്​ അവകാശമുണ്ടാകും. ഈ പ്രവർത്തനങ്ങൾക്ക്​ ജില്ലതല, ​േബ്ലാക്ക്​തല, പ്രാദേശിക കമ്മിറ്റികൾ രൂപവത്​കരിക്കാനും നിർദേശം നൽകി. ജില്ലതല, ​േബ്ലാക്ക്​തല സമിതികൾ ആഴ്ചയിൽ ഒരിക്കലും പ്രാദേശിക സമിതി ആഴ്ചയിൽ രണ്ട്​ തവണയും ചേരണം. ഉത്തരവ്​ ലംഘിക്കുന്നവർക്കെതിരെയും ലംഘിക്കാൻ പ്രേരിപ്പിക്കുന്നവർക്കെതിരെയും 2005ലെ ദുരന്ത നിവാരണ നിയമപ്രകാരം ശിക്ഷനടപടി സ്വീകരിക്കുമെന്നും​ കലക്ടറുടെ ഉത്തരവിലുണ്ട്​.